Arqalyqtaǵy Ekidin aýylynyń turǵyny ózin qorlaǵan buzaqylardy jaýapkershilikke tarta almaı, quqyq qorǵaý organdarynyń nemquraılyǵyna narazy. 22 jastaǵy qyzdyń isin advokat Aıman Omarova qolǵa almaqshy. Eki jaq arasyndaǵy daýdyń nege ákelip soǵatyny belgisiz. Sebebi bul jaǵdaıda 14 adamǵa qarsy is qozǵalmaqshy dep jazady Qamshy.kz aqparat agenttigi NewTimes.kz-ke silteme berip.
Tanymal advokat Aıman Omarovanyń aıtýynsha, qıyn jaǵdaıǵa dýshar bolǵan adamdardan oǵan jıi hat keledi. Osy joly advokatqa Arqalyqtan 22 jastaǵy qyzdan hat kelgen.
«Men Qostanaı oblysy Arqalyq qalasynyń janyndaǵy Ekidin aýylynyń týmasymyn. Bul hatty sizge jazýdaǵy sebebim – ádildik úshin kúres. Meni 14 jigit zorlap, qorlady. Osy ýaqytqa deıin bul jaǵdaıdy eshkimge aıtpaǵan bolatynmyn. Uıalyp, qorqyp júrdim. Qazir meniń aıaǵym aýyr. Týystarym men ata-anam meniń aıaǵym aýyr ekenin baıqaǵan soń barlyq mán-jaıdy bildi»,-dep jazady hatynda qyz.
Qyzdyń aıtýynsha, barlyǵy 2017 jyly bastalǵan. Ol synyptasynyń toıyna baryp, sondaǵy qonaqtardyń biriniń áıeli buny ózimen birge syrtqa shyǵyp kelýdi suraǵan.
«Dárethanaǵa bara jatyr edik, aldymyzǵa kólik kelip toqtady da, odan E.M shyǵyp, meni erkimnen tys kólikke otyrǵyzdy. Meniń janymda kele jatqan júkti áıeldiń kúıeýi-meniń synyptasym kólikke júgirip keldi, alaıda úlgermeı qaldy. Kólik júrip ketti, salonda: E:T, N.S, A.O, E.M – barlyǵy tórt adam otyrǵan. Meni B. esimdi jigittiń aýyl syrtyndaǵy úıine apardy. Eń birinshi meni E.M zorlady, odan keıin A.O, E.T, N.S. Bári bitken soń meni kafege aparyp, laqtyryp ketti. Uzaq ýaqyt ózime kele almaı, úıge áreń jettim. Alaıda qatty qoryqqandyqtan, eshkimge aıta almadym»,-deıdi qyz.
Qyzdyń aıtýynsha birneshe aıdan keıin ony taǵy 14 jigit zorlaǵan. Ol buzaqylardyń bireýinen basqalarynyń esimderin biletinin jazady. Synyptasynyń úıinen shyqqan ol kóshede bir top balalarǵa urynyp qalǵan.
2017 jyldyń qyrkúıeginde boıjetken taǵy da qorlyqqa ushyraǵan. Onyń aıtýynsha, qyzdyń synyptastary ózderin ersi ustaǵan. Qurbysynyń úıine otyrǵanda qasyna eki jigit kelgen. Qyzdyń ózin shyǵaryp salýyn suraǵanymen, qurbysy onyń jalǵyz ózin jibergen kórinedi. Sol jol qyz taǵy zorlyqqa ushyraǵan.
Úsh aıda úsh ret zorlanǵan qyz endi júkti bolyp qalǵan.
2018 jyly ol Arqalyq qalasynyń İİD-ne aryz jazǵan. Alaıda qyz kórsetken jigitterdiń barlyǵynan jaýap alynbaǵan.
«Qazir men emdelip jatyrmyn. Al meni qorlaǵandar bostandyqta júr»,-dep qapalanady ol.
Ol hatynda Aıman Omarovanyń ózine kómektesýin suraǵan.
«Qazirgi ýaqytta men bas prokýratýraǵa isti baqylaýǵa alý jóninde hat joldadym, sonymen birge İİM-ge isti Arqalyq qalasynyń İİD qyzmetkerlerine emes, Qostanaı oblysynyń İİD-ge jiberýdi suradym»,-deıdi A.Omarova.
