Prezıdenttiń Batys Qazaqstan oblysyna sapary jalǵasyp jatyr, dep jazady Qamshy.kz aqparat agenttigi.
Qazaqstan Prezıdenti qaladaǵy ortalyq alańdy aralap kórgennen keıin, memlekettik turǵyn úı baǵdarlamasynyń iske asyrylý barysymen jáne Oral qalasyn odan ári damytý josparymen tanysty.
Elbasy joldaýynda "Ákimder turǵyn úı-kommýnaldyq ınfraqurylymyn jetildirý máselesin memleket-jekemenshik seriktestigi negizinde belsendi sheshýi kerek", - dep aıtylǵan bolatyn.
Aǵymdaǵy jyly naýryz aıynda Nursultan Nazarbaev bastaǵan bes áleýmettik bastamadaǵy birinshi kezektegi másele - "árbir otbasyǵa baspana alýdyń jańa múmkindikteri" boldy.
Memleket basshysy usynǵan 5 bastamanyń alǵashqysy – elimizdiń ár otbasyna baspana alýǵa múmkindik berý. Byltyrdyń ózinde 11,2 mıllıon sharshy metr turǵyn úı paıdalanýǵa berildi. Bul el tarıhynda bolmaǵan rekordtyq kórsetkish. Degenmen, halyqtyń kóbinde baspana joq. Prezıdent muny eskerip «7-20-25» baǵdarlamasyn usyndy.
- Jumys isteıtin árbir qazaqstandyq tómendegideı sharttar boıynsha teńgemen nesıe alý múmkindigine ıe bolady. Nesıe ósiminiń mólsherlemesi qazirgideı 14-16 emes, jylyna 7 prosentten aspaıtyn bolady. Qazir bankter bastapqy jarnaǵa baspana qunynyń 30 prosentine deıin, keıde tipti 50 prosentin salýdy talap etse, bul baǵdarlama boıynsha ol 20 prosentten aspaýǵa tıis, - degen bolatyn Elbasy.
Memleket basshysyna eski úılerdi buzyp, ornyna jańa úı salý, sondaı-aq áleýmettik sala nysandarynyń qurylysyna ınvestısıa tartý barysy jóninde málimdeldi.
Sonymen qatar, Nursultan Nazarbaevqa «Aqyldy qala» tujyrymdamasy aıasyndaǵy jobalardyń iske asyrylýy týraly baıandaldy.
Elbasy, sondaı-aq, óńir jurtshylyǵymen kezdesti. Onda turǵyndar Memleket basshysyna «Bes áleýmettik bastamanyń» qabyldanǵany úshin alǵys bildirdi.
Qazaqstan Prezıdenti elimizde júzege asyrylyp jatqan áleýmettik baǵdarlamalar qoǵamnyń, ásirese jastardyń, meılinshe ózekti problemalaryn sheshýge baǵyttalǵanyn atap ótti.
Nursultan Nazarbaev Qazaqstan qoǵamynda beıbitshilik pen kelisimdi saqtaýdyń mańyzdylyǵyna toqtalyp, elimizdiń qarqyndy ekonomıkalyq damýy úshin óńirlik jáne halyqaralyq yntymaqtastyqty nyǵaıtýdyń máni zor ekenin aıtty.
Áńgimelesý sońynda Elbasy oblys turǵyndaryna tabys pen baq-bereke tilep, Qazaqstandy órkendetý isine belsendi atsalysýǵa shaqyrdy.
Pikir qaldyrý