Ótken senbi kúni aýylǵa bardym. Naǵashym kelipti. 78 jastaǵy kisi. 20 jasynan beri namaz oqyp, oraza ustaǵan, qala kórmegen, "buzylmaǵan" qarıa. Alystan at arytyp kelgen soń, aman-salamdasaıyn dep alyp-ushyp jettim. Naǵashym keıip otyr eken. Áńgimesin buzbaı qulaq molda boldym. Áńgimesinde suraq kóp... *** *** Qazaqstannyń qazaqtarynyń (Ózi Qytaıdyń Muńǵulkúre degen jerinen, Han Táńirdiń qaq mańdaıynan kelgen qazaq) sózin uqpadym. Qazaqsha saırap tursa da, saldyrlaq arba
sıaqty sambyrlap sóıleıdi eken. Orystyń maqamy baıqalady. Ásili qazaqtar bulaı sóıleýshi edi. Baıypty, salmaqty, sózi jyly, juqa, jińishke úndi bolýshy edi.
*** ***
Teledıdarlaryńnyń bári oryssha ǵoı. Qazaqsha arna joq pa?
*** ***
Prezıdentteriń Astanada da oryssha sóıleıdi eken, Á! Sonda qazaq tilin kim qoldanady?
*** ***
Almatyda kóshe avtobýstaryndaǵy bıletshi qyz-jigitter nege kóshe atyn qazaqsha aıtpaıdy?
*** ***
Avtobýstyń aıaldamasynda qyz ben jigit súıisip tur. Qasyndaǵylar qoı demeıdi, tipti qarap ta qoımaıdy. Etteri ólip ketken ba?
*** ***
Shoshqa etinen jasalǵan shujyqty jas balalar talasyp-tarmasyp, jetpeı qalsa jylap, sondaı qumarlyqpen jeıdi eken. Áke-shesheleri de nanǵa qosyp soǵyp otyr. Shoshqa álmısaqtan haram ǵoı. Sony túsinbeısińder me?
*** ***
Halyq saqshydan qatty qorqady eken. Saqshy degen halyqty qorǵaıtyn jasaýyl, kúzet emes pe?
*** ***
Narynqoldyń Sarbastaýynda jatqan atam men apamnyń basyna quran oqyǵaly bardym. Meni alyp barǵan nemere inim bir bótelke araq alyp alypty. Beıit basynda sony alyp shyǵyp quıyp jatyr. Dáret alatyn sýy shyǵar desem, "arýaqtar jaıly jatsyn!" dep tartyp jiberdi. Pátshaǵardy ábden boqtadym! Qaıtar jolda ebil-debil jyladym.
*** ***
Greste bir inim 45 jasynda qaıtys bolypty. Sonyń asynda boldym. Ólgen adamǵa berilgen asta toıǵa jınalǵandaı, sózge talasqan jurt esimdi aldy. Qudaı-oý, qazaly jerde duǵa-tilek qana bolýshy edi. Bular ólgen adamnyń sýretine qarap alyp, sonymen áńgimelesip, soǵan qarap, jylap, syrlasady eken. Tipti beıit basyna sýretin ilip qoıady eken. Bul eń jaman ádet qoı.
(Jaras Kemeljannyń feısbýktegi paraqshasynan)
Pikir qaldyrý