Almatyda bıyl tegin sanatorly-shıpajaılyq emdeýmen 4000 zeınetker qamtylmaq. Osy jyldan bastap joldama berý erejesine ózgerister engizildi. Búgingi kúni qaladaǵy zeınetkerlerdiń sany 222 myńnan asyp jyǵylady.

36 jyl memlekettik qyzmette jumys istegen Bolat Doskeev zeınetke shyqqanyna birneshe jyl boldy. Jubaıy ekeýiniń zeınetaqysyn qosa eseptegende, olar qolyna 100 myń teńgeden asa qarjy alady. Odan bólek, seksenniń seńgirinen asqan qarıa túrli áleýmettik kómekti alyp otyrady.

«Jolaqylaryn tóleıdi. Komýnaldyq úıdegi jasap jatqan esepteýish quraldar kórsetetin barlyǵynyń oǵan shyqqan shyǵyndy tóleıdi. Elektroenergıa kóbeıip ketse, ony tólep otyr. Sondyqtan men oılaımyn zeınetker adamdardy memleket shet jaqta qaldyryp otyrǵan joq», - dedi Bolat Doskeev.

Bul áleýmettik kómekterden bólek, qarıa sanatorly-shıpajaıǵa emdeýmen qamtylmaq. Qazir ol qujattaryn daıyndap júr. Atap óterligi, mundaı joldama berý erejesine ózgerister endi. Buǵan deıin tegin demalyspen qamtylýshy qarttar tek qala aýmaǵyndaǵy sanatorıada emdele alsa, osy jyldan bastap, elimizdiń kez kelgen aýmaǵyndaǵy shıpajaıdy tańdaý múmkindigin ıelendi.

«2017 jyly zeınetkerlerge 4071 joldama berilse, osy aǵymdaǵy jyly 4000 joldama qarastyrylǵan zeınetkerlerge. Al jańa zań boıynsha zeınetkerler óz qalaýymen QR kez kelgen sanatorlyq-kýrorottyq emdeý alý múmkindigi bar. Sol qarajat memleket tarapynan 109910 teńge kóleminde qaıtarylady», - dedi Almaty qalasy Jumyspen qamtý jáne áleýmettik baǵdarlamalar basqarmasynyń bas mamany Jazıra Kaırova.

Osy jyldan bastap qarıalarǵa kórsetiletin áleýmettik kómek kólemi de ulǵaıdy. Onyń ishinde bir jolǵy kórsetiletin jáne jarty jyldyq kómek bar.

«Mamyr aıynan bastap bir jolǵy áleýmettik kómek 10 aılyq eseptik kórsetkishke ulǵaıdy. Onyń kólemi buǵan deıin 7,5 aılyq eseptik kórsetkish kóleminde edi. Ol jan basyna shaqqandaǵy ortasha tabysy eń tómengi kúnkóris deńgeıinen eki aılyq eseptik kórsetkishten aspaıtyn zeınetkerler jáne áleýmettik az qamtylǵan azamattarǵa beriledi. Sondaı-aq zeınetkerler sýyq jáne ystyq sýdy esepteıtin, gazben jabdyqtaý jeke esepteýish qurylǵylaryn ornatý shyǵynyna áleýmettik kómek kórsetiledi», - dedi Almaty qalasy Jumyspen qamtý jáne áleýmettik baǵdarlamalar basqarmasy áleýmettik tólemder bóliminiń basshysy Gúlnár Muhametova.

Qazir qalada 222 myńnan astam zeınerker turady. Onyń ishindegi turmysy tómen 10 myńnan astamyna áleýmettik kómek kórsetiledi.