QR Mádenıet jáne sport mınıstri Arystanbek Muhamedıuly «Rýhanı jańǵyrý» logotıpine qatysty óz pikirin bildirdi, dep jazady Qamshy.kz aqparat agenttigi.

Japonıanyń Qazaqstandaǵy Elshisi Itıro Kavabatamen kezdesý barysynda mınıstrdiń kıiminde túrli-tústi qyrannyń beınesi jarqyrap turǵan.

«Bul tós belgini men úlken maqtanyshpen taǵyp júremin. Óte ádemi, estetıkalyq talǵammen jasalǵan. Meniń oıymsha, bul logotıpten biz uıalmaýymyz kerek. Emblema adamdarǵa rýh syılap, jigerlendiredi. Ózderińiz kórgendeı, sýrette júz paıyz sáıkestik joq. Men ózim kórdim. Keıbir jerlerinde uqsastyqtar bar, árıne, degenmen tústeri ár túrli. Bul máselede bireýdi plagıat jasady dep aıyptaý durys emes dep sanaımyn», - dep aıtyp ótti Arystanbek Muhamedıuly.

Konservotorıada vıolonchel klasyn oqyp bitirgen mınıstr óz sózinde mýzykalyq notadan úlgi keltirdi. Mınıstrdiń aıtýynsha, bir-birin múlde tanymaıtyn mýzykanttardyń da óte uqsas kompozısıalary bar.

«Mysaly, mýzykada jeti nota bar. Árbir sýretshiniń ózindik kózqarasy bolady, keıbireýleriniń talǵamy bir-birine uqsas bolýy múmkin. Fransýz sýretshisi qazaqtyń sýretshisinen kóshirip aldy dep aıta almaımyz», - dep ázildedi mınıstr.

QR Mádenıet mınıstri elde qandaı jaǵdaı bolsa da halyq tek «bizdiń otandastarymyzdy aıyptaýdy» ádet qylǵandy baıqaǵanyn da aıtty.

– Máselen, -deıdi mınıstr, - Fransıada dástúrli túrde ótetin Kann festıvalinde bas júldeni jeńip alǵan Samal Eslámova reseılik rejıserdiń arqasynda bas keıipker atandy, Dımash Qudaıbergen Qytaıdyń «týyndysy» dep bura tartyp júr. Sáýegeılikpen aınalysyp júrgen mundaılarǵa tyıym jasaý kerek. Samal da, Dımash ta Qazaqstannan shyqqan óner ókilderi. 

Aıta keteıik, ınternet jelisinde «Rýhanı jańǵyrýdyń» logotıpine qatysty daý týyndap, ony fransýzdyq uıymnyń sýretimen salystyra otyryp, jeli qoldanýshylary birshama synnyń astyna alǵan bolatyn.

Óz kezeginde, QR Aqparat jáne komýnıkasıa mınıstri Dáýren Abaev muny plagıat dep sanamaıtynyn aıtqan.