Ońtústik Qazaqstan oblysynda Elordamyz Astana qalasynyń 20 jyldyq merekesine oraı «Beket batyr» arbaty resmı túrde ashylyp, lentasy qıyldy. Saltanatty sharaǵa oblys ákimi J.Túımebaev arnaıy qatysyp, qala qonaqtary men turǵyndaryn quttyqtady.
«Shymkent – elimizdegi Astana men Almatydan keıingi eń iri qalanyń biri ekeni barshańyzǵa belgili. Sondaı-aq, Shymkent óz tarıhynda jasyl qala bolyp qalyptasqan. Búgin qalany odan ári kógaldandyryp, kórkin ashatyn demalys oryndaryn sanyn arttyrý maqsatynda «Beket batyr» arbaty halyqtyń ıgiligine paıdalanýǵa berilip otyr. Búgin mine osyndaı ıigilikti sharanyń kýási bolyp otyrmyz. Olaı bolsa jańa arbat qala turǵyndarynyń jazda saıalaıtyn, taza aýamen tynystaıtyn demalys ornyna aınalsyn. Barshańyzǵa sáttilik, shańyraqtaryńyzǵa qut-bereke tileımin!», – dedi Janseıit Túımebaev.
Arbattyń uzyndyǵy bir shaqyrym shamasynda. Onda jańa shamdar ilinip, oryndyqtar qoıylǵan. Mundaǵy 3600 sharshy metr aýmaq kógaldandyrylyp, 2000 sharshy metr jerdi aıaq joldar alyp jatyr. Budan bólek, ol jerge 700-ge jýyq jóke, talshyn, aqqaıyń syndy aǵash túrleri men 1000 túp raýshan gúli egildi. Túngi arbatty jaryq etýge 76 kóshe shamdary men 45 kishi torsherler qoıyldy.
Sondaı-aq, oblys ákimi 11, 12 shaǵyn aýdandary arqyly aǵyp ótetin Shymkent kanalynyń mańyndaǵy abattandyrý jumystarymen tanysty. Aımaq basshysy sala mamandaryna uzyndyǵy 20 shaqyrymdy quraıtyn sý arnasynyń kópqabatty turǵyn úıler shoǵyrlanǵan jaǵalaýyn demalys oryndaryna aınaldyrýdy tapsyrǵan bolatyn. Búginde atalǵan jumystar tıisti deńgeıde atqarylýda. Kanal boıynda 51 garaj bolsa, onyń 31-in garaj ıeleri óz erkimen buzǵan.
