Ońtústik Qazaqstan memlekettik pedagogıkalyq ýnıversıtetinde oblys ákimi Janseıit Túımebaev stýdent jastarmen kezdesip, «Rýhanı jańǵyrý: jastarǵa jańa baǵdar» taqyrybynda leksıa oqydy. Basqosý barysynda aımaq basshysy latyn álipbıiniń mán-mańyzyna toqtaldy. 

«Hákim Abaıdyń 25-shi qara sózinde «Zararynan qashyq bolýǵa, paıdasyna ortaq bolýǵa tilin, ónerin úırený kerek» degen sózine 100 jyldan astam ýaqyt ótse de mańyzdylyǵyn joǵaltqan joq. Aıta ketetini, biz latyn álipbıine kóshpeımiz, qaıta oralatyn bolamyz. Óıtkeni 1929-1940 jyldary osy álipbıdi qoldandyq. Atalǵan álipbı - bizdi jańa bıikterge jeteleıdi, kókjıegimizdi keńeıtedi. Osy baǵytta oblysta jalpy 1000-nan astam is-shara ótkizildi. Shet elderden kelgen jazýshylar, oblystyń zıaly qaýym ókilderi, túrkitanýshy ǵalymdarynyń qatysýymen «Latyn álipbıine kóshý – ultymyzdyń jarqyn bolashaǵy», «Jańǵyrý – jazýdan bastalady», «Til. Táýelsizdik. Taǵylym» syndy birneshe ǵylymı jıyn uıymdastyryldy», - dedi Janseıit Túımebaev.

Sondaı-aq, oblys basshysy jıylǵan qaýymnyń aldynda latyn álipbıinde jazyp kórsetip, latyn qarpiniń negizgi erejelerimen tanystyrdy. «Rýhanı jańǵyrý» baǵdarlamasynyń negizgi tustaryn jastarǵa tarqatyp aıtty.

«Osydan bir ǵasyr buryn Mirjaqyp Dýlatuly: «Ár eldiń qoldanǵan salt-sanasy sol eldiń kásibimen baılaýly. Salt-sananyń negizi – eldiń qoldanǵan kásibinde», - degen.  Bul rette Elbasymyz: «Jańǵyrý jolynda babalardan mıras bolyp, qanymyzǵa sińgen, búginde tamyrymyzda búlkildep jatqan izgi qasıetterimizdi qaıta túletýimiz kerek», - dep atap kórsetken bolatyn», - dep qorytyndylady aımaq basshysy.

Kezdesý aıasynda jınalǵan jastar oblys ákimine tolǵandyrǵan saýaldaryn qoıyp, jaýap aldy. Belsendi stýdentter túrli taqyryptarda baıandama jasady.