«Nur Otan» partıasy Tóraǵasynyń Birinshi orynbasary Máýlen Áshimbaev kitaphanalar tek kitap oqıtyn oryn ǵana emes, túrli semınarlar, trenıńter, dárister turaqty ótetin, jastardyń ǵylymı jańalyqtar men qoǵamdaǵy ózekti máselelerdi talqylaıtyn naǵyz bilim ortalyǵy bolýy tıis ekendigin aıtty. Bul jóninde ol Almatydaǵy Jambyl atyndaǵy qalalyq jasóspirimder kitaphanasyna barǵan kezde málimdedi.

Atalǵan kitaphana jastardyń zıatkerlik ortalyǵy retinde qaıta qurylyp, halyqqa zamanaýı formatta qyzmet kórsetýde. Búgin jumys saparymen Almaty qalasyna kelgen «Nur Otan» partıasy Tóraǵasynyń Birinshi orynbasarykitaphanaǵa arnaıy bardy.

Jambyl atyndaǵy kitaphananyń qaıta jańǵyrtylýy óte joǵary deńgeıde júrgizilgenin atap ótken jón. Iaǵnı, rýhanıat ordasy sońǵy úlgide jabdyqtalyp, búginde eýropalyq kovorkıng ortalyqtarynyń deńgeıinde qyzmet kórsetýde. Munda jeke jumys isteý úshin birneshe tynysh aımaq jáne jańa jobalardy top bolyp talqylaýǵa arnalǵan tıisti oryndar qarastyrylǵan. Bilim ortalyǵy qajetti kompúterlermen jáne jyldamdyǵy joǵary Wi-Fi ınternet jelisimen de jabdyqtalǵan.

Máýlen Áshimbaev atalǵan nysannyń jumysyna aıryqsha mán berip, mundaı utymdy tájirıbeni elimizdiń basqa qalalarynda da qoldaný kerektigin atap ótti.

– Elbasynyń «Rýhanı jańǵyrý» baǵdarlamasynyń negizgi baǵyttarynyń biri halyqtyń bilimge degen qushtarlyǵyn odan ári arttyrý. Sondyqtan biz otandyq kitaphanalardy osyndaı zamanaýı bilim ortalyqtaryna aınaldyrýdy kózdeıtin partıalyq jobany qolǵa aldyq. Óıtkeni kitaphanalar tek kitap oqıtyn oryn ǵana emes, túrli semınarlar, trenıńter, dárister turaqty ótetin, jastar jıi bas qosyp, ǵylymı jańalyqtar men qoǵamdaǵy ózekti máseleler talqylanatyn rýhanı orda bolýy tıis, – dedi Máýlen Áshimbaev.

Sondaı-aq partıa Tóraǵasynyń Birinshi orynbasary atalǵan partıalyq joba shalǵaıdaǵy aýyldyq kitaphanalar úshin asa mańyzdy ekenine nazar aýdaryp, joba boıynsha biryńǵaı onlaın kitaphana júıesi iske qosylatynyn jetkizdi. Sonyń aıasynda elimizdegi barlyq kitap qorynyń sıfrly nusqalary daıyndalmaq.

Sonymen qatar «Nur Otan» partıasy Tóraǵasynyń Birinshi orynbasary sapar barysynda «Mıloserdıe» erikti qoǵamy» qoǵamdyq qory Qamqorshylar Keńesiniń otyrysyna qatysty. Belsendi qoǵam qaıratkeri Arýjan Saın basqaratyn uıym balalardyń densaýlyǵyn jaqsartý jolynda «Balalarǵa ómir syıla», «Jetimdersiz Qazaqstan» jáne «Aýtızmdi jeńemiz» jobalary boıynsha aýqymdy jumystar atqaryp keledi. Qor jumysynyń mańyzdylyǵyna toqtalǵan Máýlen Áshimbaev aldaǵy ýaqytta partıa tarapynan tıisti qoldaý kórsetiletinin aıtty.