Qyrǵyz Respýblıkasynyń prezıdenti Sooranbaı Jeenbekov SHYU-ǵa múshe memleket basshylarynyń keńeıtilgen otyrysynda terorızm men ekstremızmdi nasıhattaý máselesine alańdaıtynyn málimdedi.
Jeenbekovtyń aıtýynsha, SHYU-ǵa múshe memleketterdiń berik yntymaqtastyǵy saýda-ekonomıkalyq seriktestiktiń nyǵaıýyna septigin tıgizedi. Sol sebepti saýda men ınvestısıa úshin tıimdi jaǵdaı jasaý kerek. Sonymen qatar aýylsharýashylyq salasyna de eleýli nazar aýdarý kerek ekenin eskerdi.
«Ekonomıkalyq jobalardyń tıimdi júzege asýy úshin qyrǵyz tarapy SHYU damý banki men damý qoryn qurýǵa nıetti. Qyrǵyzstan aýmaǵyndaǵy SHYU Bankin qurý máselesin qozǵap, kelisimge kelýdi usynamyz», - dedi Jeenbekov.
Qyrǵyz Respýblıkasy úshin halyqaralyq avtomobıldi tasymal úshin tıimdi jaǵdaı jasaý máselesi de basty orynda. Sol sebepti «Transportqa qoljetimdilik pen transport baılanysyn jandandyrý úshin avtomobıldi joldardy damytý baǵdarlamasyn» qabyldaýdy jedeltetýdi alǵa tartyp otyr.
«Memleketimiz Qytaı – Qyrǵyzstan – Ózbekstan temirjoly qurylysynyń jobasyn júzege asyrýdy kózdeıdi. Bul jobanyń SHYU memleketteriniń tranzıtti jáne eksporttyq áleýetin damytýda úlesi zor», - dedi qyrǵyz basshysy.
Aıta keteıik, Qytaıdyń Sındao qalasynda Shanhaı Yntymaqtastyq uıymynyń resmı jınalysy bastaldy.
Sındao samıti segizdik formatta alǵash ret ótip jatyr. Otyrysqa Qazaqstan Prezıdenti Nursultan Nazarbaev, Reseı Prezıdenti Vladımır Pýtın, Qyrǵyz Prezıdenti Sooronbaı Jeenbekov, Pákistan Prezıdenti Mamnýn Hýseın, Tájikstan Prezıdenti Emomalı Rahmon, Ózbekstan Prezıdenti Shavkat Mırzıeev, Úndistan Premer-Mınıstri Narendra Modı, SHYU-ǵy baıqaýshy mártebesi bar Aýǵanstan Prezıdenti Ashraf Ǵanı, Belarýs Prezıdenti Aleksandr Lýkashenko, Iran Prezıdenti Hasan Roýhanı jáne Mońǵolıa prezıdenti Haltmaagıın Battýla jáne birqatar halyqaralyq uıymnyń basshylary qatysty.
Jıyn qorytyndysyna sáıkes, Shanhaı Yntymaqtastyq uıymynyń kelesi tóraǵasy Qyrǵyzstan boldy. Shı jın pıń Qyrǵyz Respýblıkasynyń uıymǵa tóraǵalyǵyna qoldaý kórsetetinin málimdedi.
Keńeıtilgen quramdaǵy otyrystan keıin samıttiń basty qujaty Sındao deklarasıasy qabyldanyp, 20-dan astam qujatqa qol qoıylmaq. Onyń 17-sin Memleket basshylary rásimdeıdi.
