Almatyda Dinmuhamed Qonaev mýzeı-úıi alańynda Halyqaralyq balalardy qorǵaý kúnine oraı merekelik shara uıymdastyryldy.

Mýzeı qyzmetkerleriniń aıtýynsha, munda jyl saıyn balalar kúni qarsańynda ashyq esik kúni ótip, merekelik baǵdarlama uıymdastyrylady eken.

«Balalar bizdiń basty qonaǵymyz. Birinshi merekemiz - mýzeı kúni bolsa, ekinshi mańyzdy shara  - balalar merekesi. Biz úshin mańyzdysy - olardyń kóńil-kúıiniń kóterińki bolýy. Balalarǵa jyldyń ár kúninde qorǵan bolýymyz kerek. Biraq  dál osy kúni olar erekshe meıirimdi kútedi», - dedi mýzeıdiń ǵylymı qyzmetkeri Elena Ibatqyzy.

Merekelik sharaǵa kórshi úılerdegi balalar shaqyryldy, sondaı-aq aýlada ata-anasymen qydyryp júrgen búldirshinderdiń bári kelip qatysýǵa múmkindik aldy.

«Qonaev mýzeıi qonaqqa balalaryńyzdy alyp kelińizder degen soń, qýana kelistik. Eki balamdy alyp keldim. Balalarymyzdyń qýanyshynda shek joq. Bar baılyǵymyz balalar bolǵan soń, olardyń shattanǵanyna ne jetsin. Mundaı sharalar uıymdastyryla bersin, biz ákelýden jalyqpaımyz», - dedi Maıragúl Hasenqyzy.

Shara barysynda balalardyń psıhologıalyq tanymyn baıqaý úshin sýret salýdan saıys uıymdastyryldy. Sondaı- aq, baǵdarlama boıynsha balalar tústi qaǵazdardan aplıkasıa jasap, múltfılm tamashalap, án aıtty. Sońynda balalarǵa syılyqtar úlestirildi.