Qazaqstannyń Syrtqy ister mınıstrligi Iranda derekti kıno túsirip júrgen qazaqstandyq rejıser, senarıst ári operator Qanat Beısekeev ustaldy degen aqparatqa qatysty pikir bildirdi, - dep habarlaıdy Qamshy.kz aqparat agenttigi Tengrinews.kz - ke silteme jasap.

"Bıylǵy 16 maýsymda Qazaqstannyń Gorgan qalasyndaǵy Bas konsýldyǵy úsh adamnan turatyn qazaqstandyq túsirilim tobymen kezdesýi kezinde Iranda túsirilim jasaýǵa arnaýly vızasynyń bolmaǵanyn anyqtap, jergilikti bılikten osy qujatty alýdy keńes etti. Bas konsýldyqtyń málimetinshe, túsirilim toby Qazaqstanǵa ushý úshin Tegeranǵa attanǵany anyqtaldy. Qanat Beısekeev túsirilim jasaýǵa arnaıy ruqsatty alýda konsýldyq mekemesiniń qolǵabys etýinen ýaqytynyń tapshylyǵyna baılanysty bas tartty. Alaıda 20 maýsymda túsirilim toby Gorgan qalasyna oralyp, túsirilimin jalǵastyrǵan, munda jergilikti kóshi-qon organdary túsirilimge ruqsatynyń bolmaýyna baılanysty olardan Tegeranǵa oralýyn suraǵan", - delingen vedomstvo habarlamasynda.

Irandaǵy demalys kúnderine qaramastan Bas konsýldyqtyń túsirilim tobynyń qaıda ekenin anyqtaý úshin jergilikti bılikpen baılanys ornatýǵa tyrysyp jatqany aıtylady. Bas konsýldyq osy másele boıynsha Irannyń Syrtqy ister mınıstrligine arnaıy nota joldaǵan.

Eske salaıyq, munyń aldynda PR-maman Álisher Elikbaev Iranda derekti kıno túsirip júrgen qazaqstandyq rejıser, senarıst ári operator Qanat Beısekeevtiń ustalǵanyn habarlaǵan edi. 

"Ol bul elde fılm túsirip jatyr. Endi Irandaǵy qazaqtar týraly fılm shyǵa ma, joq pa - belgisiz. Sol jaqta júrgenine biraz ýaqyt boldy. Endi ǵana estip otyrmyn. Jaǵdaıdyń mán-jaıyn bilmeımin.  Buǵan deıin ol Mońǵolıadaǵy qazaqtar týraly fılm túsirgen, keıin Ózbekstanǵa baryp, sondaǵy qazaqtar jaıly fılm túsirdi, endi Iranǵa barǵan", - dedi Álisher Elikbaev.

Onyń aıtýynsha, Beısekeevten birneshe myń dollar turatyn qural-jabdyǵy tárkilengen.