Tildik qoldanysymyzǵa «sıfrlandyrý» sóziniń engenine kóp bola qoıǵan joq. Alaıda sandyq tehnologıaǵa kóshý qaı salany bolsa da jandandyrǵany anyq. Osy oraıda Oral gaz, munaı jáne salalyq tehnologıalar kolejinde  «Sıfrly oqý orny» atty oblystyq ınovasıalyq jobalar baıqaýy ótti. Tehnıkalyq jáne kásiptik bilim berý uıymdarynyń stýdentteri arasynda ótken baıqaýǵa 14 kolejden 27 stýdent qatysyp, óz jobalaryn usyndy. Oblystyq bilim basqarmasynyń oqý-ádistemelik kabınetiniń bólim basshysy Raıgúl Qýanshalıeva mundaı baıqaý BQO-da birinshi ret uıymdastyrylǵandyǵyn aıtady.

– Baıqaýdyń maqsaty – stýdentterdiń ınovasıaǵa degen qyzyǵýshylyǵyn arttyrý. Olardyń sıfrlyq saýattylyqtaryn damytyp, úzdik ınovasıalyq jobalardy anyqtaý, kreatıvti izdenisti yntalandyrý bolyp tabylady. Elbasymyz bıylǵy Joldaýynyń «Adamı kapıtal – jańǵyrý negizi» baǵytynda «Jumys berýshilerdi tartý arqyly jáne halyqaralyq talaptarmen sıfrlyq daǵdylardy eskere otyryp, tehnıkalyq jáne kásiptik bilim berý uıymdaryndaǵy baǵdarlamalardy jańartý kerekpiz» dep atap ótken bolatyn. Búgingi baıqaýdy osy maqsatta ótkizdik, endi bul baıqaýdy bes jyl qatarynan ótkizbekpiz, – deıdi Raıgúl Tilekqabylqyzy. 

Qatysýshy stýdentter óz jobasyn tóreshiler aldynda eki seksıaǵa bólip qorǵady. Ádilqazy alqasynyń sheshimimen bas júlde birinshi seksıada «Damytý oıyndarynyń úzdik jobasy» baǵyty boıynsha «LatynQaz» oıyny taqyrybyndaǵy jobasy úshin Oral qalasyndaǵy J. Dosmuhamedov atyndaǵy pedagogıkalyq kolejiniń stýdenti Andas Qajymovqa, ekinshi seksıada elektrondy-sıfrlyq resýrs ázirleý salasyndaǵy úzdik joba (elektrondy oqýlyqtar, elektrondy oqý quraldary) baǵyty boıynsha «Latyn álipbıi» elektrondyq oqý quraly taqyrybyndaǵy jobasy úshin taǵy da atalmysh kolejdiń stýdenti Asylhan Ájimuratqa berildi. Sátti shyqqan ózge de jobalarǵa júldeli oryndar berilip, alǵysqattarmen marapattaldy.