Memleket basshysy Nursultan Nazarbaevtyń bastamasymen qazaqstandyqtar bıyl tuńǵysh ret Ulttyq dombyra kúnin toılaýda. Aqtóbe oblysy merekeni uıymdastyrýǵa erekshe atsalysty. Barlyq eldi mekenderde ótken 750 is-sharaǵa 270 myń oblys turǵyny qatysty.

Ulttyq dombyra kúnine arnalǵan úlken mereke 30 maýsymda bastalǵan bolatyn. Aqtóbede eki jyl buryn ornatylǵan 6 metrlik dombyra janynda dombyrashylardyń sherýi men baıqaýy ótti.

1 shildede oblys ortalyǵynyń da kógin uly dalanyń áýenderi kernedi. Júzdegen kásibı mýzykanttar men áýesqoı dombyrashylar qazaq halqynyń kórnekti kompozıtorlarynyń ólmes týyndylaryn qalanyń ártúrli jerindegi 6 ashyq alańda bir mezgilde oryndaý arqyly ulttyq mýzykalyq aspapqa degen súıispenshilikterin bildirdi.

Ertemen bastalǵan merekelik sharalar 12 saǵatqa sozyldy. Aqtóbe qalasy men aýdan ortalyqtarynyń barlyq turǵyndary men qonaqtaryna dombyrashylar konserti, dombyrada oınaýdy úıretý men aǵash qolóneriniń sheberlik sabaqtary, jas kúıshiler baıqaýy, ekspozısıalyq jáne kitap kórmeleri,  dombyra-patı, qoldanbaly óner buıymdarynyń jármeńkesi men mýzykalyq vıktorınalar uıymdastyryldy.

Merekeniń eń jas qonaqtary úshin arnaıy oıyn-saýyq baǵdarlamasy daıyndaldy.

Aqtóbelikter óńirde 1 shilde kúni  dúnıege kelgen árbir tuńǵysh balaǵa dombyra tartý etýimen de erekshelendi.

Negizgi mereke Ortalyq stadıonda saǵat 18:00-de bastaldy. Onyń aqyrǵy akordy 500 dombyrashynyń stadıonda «Aqtóbe» - «Shahter» fýtbol machynyń aldynda «Balbyraýyn» jáne Qurmanǵazynyń «Adaı» kúılerin, Ahmet Jubanovtyń «Bı kúıin» oınaǵan  fleshmoby boldy.

Aıta keteıik, sol kúni Ǵ.Jubanova atyndaǵy Aqtóbe oblystyq fılormonıasynyń ulttyq aspaptar orkestri qazaq ulttyq aspaptar murajaıynyń ashylýynda elorda turǵyndary men qonaqtaryn ózderiniń shyǵarmalarymen qýantty.