Qazaqstannyń Halyq aqyny, jazýshy Muhtar Shahanovtyń shyǵarmashylyq úıi ózi týǵan Otyrar aýdany, Jańa Shilik aýylynda ashyldy. Aıtýly shara aqynnyń 76 jasqa tolǵan týǵan kúnine oraı uıymdastyryldy.
Ǵımarattyń saltanatty ashylýyna oblys ákiminiń orynbasary Sadyr Erbol Ábilqaıyruly qatysyp Elbasy Nursultan Ábishuly Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasy negizinde «Týǵan jerge taǵzym» aksıasy aıasynda oblys kóleminde kóptegen ıgi sharalar atqarylǵanyn atap ótti. "Solardyń biri de biregeıi - elge belgili mesenat Serikjan Seıitjanovtyń demeýshiligimen boı kótergen shyǵarmashylyq úıi. Bul ortalyq bilim men ǵylymnyń, ádebıet pen ónerdiń ordasyna aınala bersin!» - degen izgi tilegin jetkizgen E.Ábilqaıyruly álem aqynyna óńir basshysynyń quttyqtaýy men syı-sıapatyn tabys etti.
Saltanatty túrde lentasy qıylǵan eki qabatty ǵımaratta aqynnyń balalyq shaǵynan búgingi kúnge deıingi ómir jolynan túrli sýretter men, qujattar ornalastyrylǵan.
Sondaı-aq, aqynnyń shyǵarmashylyqpen aınalysatyn jumys kabınetteri men kitaphana, demalys jáne qonaq qabyldaıtyn bólmeler zaman talabyna saı jabdyqtalǵan. Ashylý saltanatyna kelgen qonaqtar Otyrar aýdany ákiminiń tapsyrysymen aqynyń shyǵarmasy jelisinde jasalǵan «Otyrar dastany» anımasıalyq fılmdi tamashalady.
El janashyrlary Serikjan Seıitjanov pen Otyrar aýdanynyń ákimi Erlan Aıtahanovqa jáne jumyla qoldaý bildirgen aýdan halqyna alǵysyn bildirgen aqyn Muhtar Shahanov óz ómirinen estelikter aıtyp, kópshilikti Astananyń 20 jyldyǵymen quttyqtady.
Aqynnyń talantyna bas ıgen ónerpazdar týǵan kún ıesiniń jańa óleńderin jatqa oqyp, ánderin áýelete shyrqady.
