Sońǵy jyldary otandyq kitaphanalardyń qyzmet kórsetý sapasy aıtarlyqtaı aqsap, jańasha ekpindi qajet etip turǵany jasyryn emes. Osyny eskergen «Nur Otan» partıasy elimizdegi kitaphanalardyń qymzetin jańǵyrtýdy qolǵa aldy.

Atalǵan joba qazirdiń ózinde óz jemisin berip, kóptegen kitaphanalar jańasha qyzmet kórsetýdi bastap ketti. Solardyń qatarynda Shymkent qalasyndaǵy «Otyrar» ámbebap ǵylymı kitaphanasy da bar. Munda partıanyń bastamasymen ashylǵan kovorkıng-ortalyq jańa tehnologıamen, jyldamdyǵy joǵary ınternetpen jabdyqtalǵan. Odan bólek, ortalyqta konferens-zal qarastyrylyp, onda túrli taqyryptarda semınarlar, dárister jáne trenıńter ótkizýge jaǵdaı jasalǵan. Sondaı-aq demalys aımaǵy, kıno zaly, kofehana, kitap dúkeni, aǵylshyn tilin úıretetin kýrs jáne erkin pikirtalas aımaǵy bar. Osylaısha dástúrli kitaphanadan jańa zaman talaptaryna saı bilim ortalyǵy retinde qaıta jańǵyrǵan nysan jergilikti jastardyń jıi bas qosatyn jerine aınalyp otyr.

Búgin Shymkent qalasyna arnaıy saparmen kelgen «Nur Otan» partıasy Tóraǵasynyń Birinshi orynbasary atalǵan nysanǵa baryp, atqarylǵan jumystarmen tanysty. Osyndaı kovorkıng-ortalyqtar jastarǵa berilip otyrǵan úlken múmkindik ekenin aıtqan Máýlen Áshimbaev ony jastar, sonyń ishinde «Jas Otan» jastar qanatynyń músheleri tıimdi paıdalanýy kerektigin tilge tıek etti.

– Elbasynyń «Rýhanı jańǵyrý» baǵdarlamasynyń negizgi baǵyttarynyń biri – halyqtyń bilimge degen qushtarlyǵyn arttyrý. Osyǵan oraı «Nur Otan» partıasy elimizdegi kitaphanalardyń qyzmetin jańǵyrtyp, olardy jańa zamanǵa saı kovorkıng-ortalyq retinde qaıta qurý jobasyn qolǵa aldy. Sebebi, kitaphanalar tek kitap oqıtyn oryn emes, túrli semınarlar, trenıńter, dárister ótetin, jastar jıi bas qosatyn naǵyz bilim ortalyǵy bolýy tıis. Sondyqtan osyndaı ortalyqtardy mazmundy, mándi dúnıelermen toltyrýymyz kerek. Jobanyń negizgi maǵynasy da osy, ıaǵnı dástúrli kitaphanalarǵa jastardy tartyp, olardyń kitap oqýǵa, sapaly bilim alýyna jaǵdaı jasaý, – dedi Máýlen Áshimbaev.

Sonymen qatar «Nur Otan» partıasy sıfrlandyrý isine úles qosý, halyqtyń sıfrly saýattylyǵyn arttyrý, jastardyń sapaly bilim alyp, deni saý urpaq bolyp qalyptasýyna jaǵdaı jasaý maqsatynda birqatar jobalardy júzege asyra bastaǵany belgili. Soǵan oraı Máýlen Áshimbaev Shymkentke sapary barysynda M.Áýezov atyndaǵy Ońtústik-Qazaqstan memlekettik ýnıversıtetinde «Nur Otannyń» bastamasymen ashylǵan İT-ortalyqqa jáne Ońtústik Qazaqstan memlekettik pedagogıkalyq ýnıversıtetinde jumysyn bastaǵan İT-synyptarǵa bardy. Sondaı-aq partıa Tóraǵasynyń Birinshi orynbasary «Rýhanı jańǵyrý» baǵdarlamasy jáne bıznestiń áleýmettik jaýapkershiligi aıasynda salynǵan múmkindigi shekteýli balalarǵa arnalǵan «Áıgerim» arnaýly korreksıalyq balabaqshasyna baryp, bul sala únemi partıanyń basty nazarynda ekenin aıtty.

Sapar sońynda partıa Tóraǵasynyń Birinshi orynbasary «Nur Otan» partıasynyń Shymkent qalalyq fılıalynyń konferensıasyna qatysty. Onda partıa qalalyq fılıalynyń tóraǵasy bolyp Shymkent ákimi Ǵabıdolla Ábdirahymov saılandy.