Almatyda Astana kúnine tartý retinde 20 mertlik quraq kórpe tigildi. Merekelik shara Ortalyq mádenıet jáne demalys saıabaǵynda atalyp ótti.

Almatyda «Naýryz-2018» merekesi aıasynda qolǵa alynǵan eń uzyn quraq kórpe tigý jumysy búgingi sharada jalǵasyn tapty. Medeý aýdanynyń «Ájeler» ansambli qala turǵyndary men qonaqtaryna arnap  quraq kórpe tigýden sheberlik sabaǵyn ótkizdi. 

Megapolıste «Gınesstiń rekordtar kitabyna» ený úshin uzyndyǵy 25 500 sharshy  metr kórpe tigý josparlanǵan. Sonyń úlesi retinde Astana kúnine oraı kórpeniń 20 metrlik bóligi búgin tigildi.

Shara aıasynda qolóner men sándik qoldanbaly óner jármeńkesi ótti. Mereke Baqytjan Baıqadamov atyndaǵy Memlekettik hor kapelasynyń qatysýymen konserttik baǵdarlamaǵa ulasty.

Al saıabaqtyń kishkentaı qonaqtaryna Astananyń qonaqjaı kórinisinen habar beretin ekskýrsıa ótkizildi. Sondaı-aq olar sýret salýdan ózara saıysqa tústi.

Merekelik sharaǵa uıytqy bolǵan Medeý aýdany ákimdigi qyzmetkerleriniń aıtýynsha, Astana kúni ataýly kúnder arasynan  laıyqty ornyn alǵan.

«Astana kúni - halyq úshin tarıhı-mádenı máni zor mereke. Jas qalamyz respýblıkamyzdyń osy kúnge deıin jetken jetistiginiń sımvoly. Bul kúnniń memlekettik mereke bolyp bekitilýi óte ádiletti. Jas Astanamyzben maqtanamyz. Buǵan Elbasymyzdyń sińirgen eńbegi mol»,-dedi Almaty qalasy  Medeý aýdany ákiminiń shtattan tys keńesshisi Janna Dosanova.