Almatyda 2A kategorıalyq qıyndyqta «Nursultan shyńyn» baǵyndyrý alpınıadasy ótti. Alpınıadaǵa 12 jastan asqan 5 myńnan astam adam 4376 metr bıiktikti baǵyndyrýǵa nıet bildirgenimen, olardyń 200-den astamy ǵana shyńǵa shyǵa aldy. Qatysýshylardyń arasynda ózge memleket qonaqtary, sondaı-aq Almaty qalasy Dene shynyqtyrý jáne sport basqarmasynyń basshysy Ábil Dóńbaev ta boldy.

Sharanyń ashylý saltanatynda elimizdiń belgili álpınısi Maqsut Jumaev qonaqtardy Astana kúnimen quttyqtap, álpınızmmen aınalysýǵa keńes berdi.

Aıta keteıik, alpınıadamen bir mezgilde «Shymbulaq» taýshańǵy kýrortynda skaırannıng sportynan Qazaqstan chempıonaty bastaldy. Birneshe jas aıyrmashylyq boıynsha 100-den astam sportshy óz baqtaryn synap kórýge tyrysty. Solardyn biri, júldeli oryn alǵan Raýan Abylhanov óz oıymen bólisti.  

«Daıyndyq taýda emes, qalada ótti. Ózim osy jarysqa jıi qatysamyn. Maǵan júgirgen óte unaıdy. Búgin óz jasym boıynsha - birinshi, al «absolútte» úshinshi oryn aldym. Ýaqytym - 1 saǵat 53 mınýt», - dedi áskerı ınstıtýtynyn serjanty Raýan Abylhanov.  

Skaırannıngtiń barlyq júldegerleri men jeńimpazdary medaldarmen, al alpınıada qatysýshylary sertıfıkattarmen marapattaldy.  

Atalmysh sharalar salaýatty ómir saltyn ustanyp, jastar arasynda sportty damytý maqsatynda jyl saıyn ótkiziledi.