Bıe sútinen jasalǵan, janýar óniminsiz vegeterıan balmuzdaǵy, belsendirilgen kómir qosylǵan qara balmuzdaq, bıobalmuzdaq. Almatyda Ortalyq mádenıet jáne demalys saıabaǵynda ótken «BalmuzDay» festıvalinde muzdaı dámniń erekshe túrleri usynyldy.
Jazǵy maýsymda asa qajet balmuzdaqtyń kóńil-kúıdi kóteretini belgili. Búginde óndirýshiler onyń densaýlyqqa paıdasyna erekshe kóńil bólýde. Taǵamdy talǵap jeıtinderge balmuzdaqtar arasynan da mol tańdaý bar.
Álem boıynsha Qazaqstanda alǵash ret bıe sútinen balmuzdaq jasaldy. Quramynda qanty joq, gıppolergendi balmuzdaqtyń óz tutynýshylary bar. Máselen, sıyr sútinde kezdesetin aqýyzǵa alergıasy bar adamdar, gıppoalergendi saýmaldan jasalǵan balmuzdaqty jeı alady.
«Bıe súti saýmaldan jasalǵan balmuzdaq. Buǵan qant qosylmaǵan. Saýmal gıppoallergendi ári tátti. Sondyqtan bul balmuzdaqtyń dámi basqalaryna uqsas keledi. Kóbinese dıabetpen aýyratyndar men alergıasy bar adamdar tutynady. Álem boıynsha alǵash ret bizdiń elde jasalǵan ónim. Qazaqstan naryǵynda 2 jyldan beri barmyz. Sheteldikter Otanyna bazarlyq retinde alyp ketip jatady»,-dedi Qazaq taǵamtaný akademıasynyń mamany Aqerke Beısenǵalı.
Muny tutynbaıtyndar úshin vegeterıandyq balmuzdaq túri de bar. Eco Shmeko Qazaqstanǵa nebári eki apta buryn kelgen.
«Bul vegeterıandyq balmuzdaq. Janýar súti qosylmaǵan. Muzdatylǵan jemis-jıdekterden jasalady. Syrtyndaǵy vaflıi de vegeterıandyq tásilde daıyndalǵan. Dámi kádimgi balmuzdaqtan da táttirek ári zıansyz. Adamdar qyzyǵýshylyq tanytýda. Mundaı ónim ázirge Qazaqstanda joq. Biz 2 apta buryn ǵana alǵashqy saýdamyzdy jasadyq,- dedi Eco Shmeko balmuzdaǵyn satýshy Arash.
Sońǵy kezde Almatyda qara tústi balmuzdaq paıda boldy. Quramyna belsendirilgen kómir qosylǵan táttiniń aǵzaǵa jaǵymdy áseri bar.
«Qara balmuzdaqtyń ereksheligi quramynda belsendirilgen kómir bar. Ol tátti ári paıdaly. Aǵzadaǵy toksınderdi aıdap shyǵarady. Belsendi kómirdiń mólsheri kóp emes, sondyqtan balmuzdaqty jeýge qandaı da bir shekteý qoıylmaǵan. Budan bólek quramynda belgıalyq shokolad dámi bar. Almaty turǵyndarymen bir aıdan beri tanyspyz»,-deıdi satýshy Ánýar Akýov.
Dástúrli «BalmuzDay» festıvali bıyl Almatyda úshinshi ret ótýde. Ereksheligi sol, bul joly shara eki kúnge ulasady. Eń alǵash festıváldi ótkizý ıdeıasyn usynǵan Mıra Salambaeva búginde onyń uıymdastyrýshysy.
«Eń alǵash otbasylyq merekelik festıvál uıymdastyrsam degen nıet bolǵan. Almatyda ashyq aspan astynda «BalmuzDaydy» ótkizý men úshin tabylǵan ıdeıa boldy. Úshinshi jyl ótkizilip otyrǵan shara bul joly eki kezeńnen turady. Búgin kelýshiler balmuzdaqtyń túr-túrinen dám tatýǵa múmkindik aldy. Sonymen qatar balalardyń oryndaýynda konsertik nómirlerdi nazarlaryńyzǵa usynyp otyrmyz. Utys oıyndaryn uıymdastyrdyq. Búgingi festıvál qonaqtary sýretke túsip, ony Instagram áleýmettik jelisinde #balmuzday_2018 heshtegimen jarıalap, syılyqtarǵa ıe bola alady. Konsertke aýtızmmen aýyratyn balalar qonaq bolady. Biz olarǵa balmuzdaq úlestiremiz. Ári bizdiń seriktesterimizdiń atynan syılyqtar tabystalady»,-dedi Mıra Salambaeva.
Onyń aıtýynsha, festıvál erteń án baıqaýymen jalǵasady. Munda 3-ten 16 jasqa deıingi balalar ata -analarymen án shyrqaıdy. Qazylar alqasy qatysýshylardy otbasylyq jáne jeke oryndaý atalymynda marapattaıtyn bolady.
