Oblystyq Nartaı Bekejanov atyndaǵy qazaq mýzykalyq drama teatry 2018 jyldyń tamyz aıynda Edınbýrg qalasynda ótetin «Frındj» halyqaralyq óner festıvaline qazaqtyń halyq jazýshysy Ǵabıt Músirepovtiń «Qozy Kórpesh-Baıan Sulý» lıro-epostyq dramasynyń jelisi boıynsha sahnalanǵan «Aqbaıan» spektaklimen qatysady.

Halyqaralyq «Frındj» («Fringe») festıvali 1947 jyldan bastap jyl saıyn tamyz aıynda Shotlandıa elinde ótkizilip keledi. Álemdegi eń joǵary deńgeıde ótetin óner festıválderiniń biri. Festıválge álemniń 50 memleketinen 50000 ónerpazdar qatysady jáne 3000-ǵa jýyq qoıylymdar kórsetiledi.

Syr teatry usynǵaly otyrǵan «Aqbaıan» spektaklin qoıǵan rejıser teatrdyń kórkemdik jetekshisi, Qazaqstannyń eńbek sińirgen qaıratkeri Ámir-Temir Huseın Júsipuly. Kórkemdegen sýretshi Nurken Qalymbetov. Spektáklde óner kórsetetin artıserdiń basym kópshiligi jastar. Atap aıtsaq, Aqbaıan rolinde – Zarına Kenjeáli, Aıym Begmat, Qozy rolinde – Sanat Júzbaı, Qodar – Qanat Arhabaev jáne Qarabaı rolinde – Qazaqstan Jastar Odaǵy «Serper» syılyǵynyń laýreaty Baqytbek Temirbekov, Sarybaı – Syrym Ábdrazaqov, Maqpal – Qazaqstan Respýblıkasy Mádenıet mınıstrliginiń Mádenıet qaıratkeri tósbelgisiniń ıegeri Zalıpa Tólepova jáne Kúnekeı rolinde – Aqtolqyn Tóleýova.

Mahabbat hıkaıasyna toly elý mınýttyq qoıylymda – besikte atastyrylyp, biraq joldary ekige aıyrylǵan, on jeti jyldan soń qaıta júzdesken qos ǵashyqtyń taǵdyry sýretteledi. Bir-birin kórýge

yntyq júrekter qaıta tabysady. Alaıda, olardyń qosylýyna kedergi bar. Biri – qalaıda dúnıesin toltyrýdy kózdegen qyz ákesi Qarabaı. Ekinshisi – Baıanǵa ǵashyq, tek kúshine sengen Qodar. Spektáklde qazaqtyń salt-dástúrleri - ulttyq bıi oryndalyp, asyq, arqan-tartys sekildi ulttyq oıyndar oınalyp, qoıylymnyń óne boıynan qazaqtyń ulttyq naqyshtaǵy kıimderi kórinis tabady.

"Qazaqtyń ulttyq máıegi men mádenı qundylyǵy toǵysqan «Aqbaıan» spektaklimen álem sahnasyna jol tartyp, barsha qazaq óneriniń júgin arqalaǵan Nartaı Bekejanov atyndaǵy qazaq drama teatry úshin bul - úlken tarıhı qubylys jáne mártebeli mindet bolyp tabylady", - dedi teatrdyń kórkemdik jetekshisi, Qazaqstannyń eńbek sińirgen qaıratkeri Ámir-Temir Huseın Júsipuly.

Jarty ǵasyrdan astam tarıh qoınaýyndaǵy Nartaı Bekejanov atyndaǵy qazaq mýzykalyq drama teatrynyń repertýarynda túrli janrdaǵy kórermen talǵamyna saı sapaly qoıylymdar qatary bar.

Sonymen qatar, teatrdyń shyǵarmashylyq quramynda jastar trýppasy, qýyrshaq toby jáne dramalyq ujymdy qosqanda barlyǵy 50-ge jýyq artıser qyzmet etedi.

Teatr 63 jyldyq maýsymynda bes memleketke úlken gastróldik saparmen baryp, qazaq óneriniń mártebesin kóterip, mereıin asqaqtatty. Onyń ishinde, Tatarstan, Túrkıa, Ázerbaıjan jáne Ulybrıtanıa elinderinde ótken óner dodalaryna qatysyp, úlken jetistiktermen oraldy.

Qosymsha aqparat: Halyqaralyq «Frındj» festıvali - álemdegi eń joǵary deńgeıde ótetin úlken óner festıválderiniń biri. Atalmysh festıválge mýzykalyq, etnıkalyq, kıno jáne eń basty eki sala – operalyq jáne eksperımentaldy teatrlar qatysady.

Festıvál tarıhy sonaý 1947 jyldan bastaý alady. Alǵashqy Halyqaralyq Edınbýrg festıvaline qatysa almaǵan, ıaǵnı festıvál baǵdarlamasyna enbeı qalǵan birneshe teatr trýppalary erkin túrde qoıylymdar uıymdastyryp, barlyq qala alańdarynda kórermenderge usyndy. Osyndaı tyń qubylystardan soń synshylar tarapynan oń nátıjeli pikirler aıtylyp, sol ýaqyttan beri «Frındj» jáne Halyqaralyq Edınbýrg festıvali qatar ótkizilip keledi.

«Frındj» álem boıynsha eń úlken jáne óner ujymdary úshin óte qolaıly uıymdastyrylǵan festıvál. Festıvál dástúri boıynsha aqyly qoıylymdar arnaıy 4 úlken ashyq alańdarda ótedi. Olar: Pleasance, Assembly Rooms, Gilded Balloon jáne Underbelly. Al, aqysyz qoıylymdardyń basym kópshiligi ataqty týrısik kóshede jáne Maýnd belesinde ótedi.