Almatyda 19-26 tamyz kúnderi stýdentter arasynda fýtzaldan Álem chempıonaty ótedi. Osyǵan oraı, «Sporttyq Almaty» baǵdarlamasy aıasynda fýtboldan qyzdar jáne uldar aýla komandalary arasynda lıga ótti.

Jarys Ál-Farabı atyndaǵy QazUÝ stadıonynda olımpıadalyq júıe boıynsha ótkizildi.  

Uldar men qyzdar arasynda ótken oıynǵa 800-den astam adam qatysty. Onyń ishinde 40 qyz baq synady. Arasynda álem chempıonatynda óner kórsetetinder de bar.    

«Uıymdastyrýshylarǵa osyndaı týrnır úshin kóp rahmet. Qazir qyzdar fýtbolyna az kóńil bólinýde. Sondyqtan bul kele jatqan álem chempıonatyna jaqsy daınydyq. Jaqynda Qyrǵyzstanǵa jıynǵa bardyq. Komandamyzdyń quramyna irikteý júrgizilýde. Jaqsy nátıje kórsetemiz dep oılaımyz. Men ózim fýtbol oınaǵanyma kóp boldy. Qazaqstan chempıonatyna jıi qatysamyn. Osyndaı álemdik dodada óner kórsetý - men úshin úlken mártebe», - deıdi aýla lıgasyna qatysýshy jáne fýtzaldan ulttyq quramanyń kapıtany Ramına Mamedova.  

Týrnır nátıjesinde qyzdar komandalary arasynda birinshi orynǵa QazSTA stýdentteri ıe boldy. Al, ekinshi jáne úshinshi oryndy «Legıon» men «Kosmos» jeńip aldy.  

Uldar arasynda birinshi «A» lıgasyna - 8-den 14 jasqa deıingi jasóspirimder qatysyp, «Qaırat» klýby chempıon atandy. «Devıl of hel» men «Bókeıxanov» oıynshylary kúmis pen qolany qanaǵat tutty.    

Al, ekinshi «B» lıgasyna - 15 jastan joǵary úmitkerler qatysty. Bul jerde «Olımp», «Legıon» jáne «Tastaq» ujymdary júldeli oryndardy ózara bólisti.    

Jeńimpazdar men júldegerler dıplom, medal, syılyqtarmen marapattaldy.