Almaty ákimi Baýyrjan Baıbek jumys sapary kezinde qoqys suryptaıtyn jańa keshenniń, gazben júretin avtobýstar úshin salynyp jatqan komýnaldy parktiń jáne elektroavtobýstardyń sońǵy túrin shyǵaratyn zaýyt qurylystarynyń qarqynyn tekserdi.
Megapolıs basyshysy EXPO-2017 murasy aıasynda bul jobalardyń jáne «Almatyny damytýdyń 50 jobalary – draıverleri qalalyq bastamasynyń zamanaýı ári mańyzdy ekenin, óıtkeni olardyń barlyǵy sońǵy ınovasıalyq tehnologıalardy tartatynyn, jańa jumys oryndaryn quratynyn, sonymen qatar qalanyń qorshaǵan ortasyna túsetin ekologıalyq júktemeni tómendetetinin atap ótti.
«FalconEuroBus» qazaqstandyq – nemis kompanıasy avtoparktiń jáne elektroavtobýstardyń úshinshi túrin shyǵaratyn zaýyttyń qurylystaryn júrgizýde. Qazirgi kezde jalpy alańy 7 myń sharshy metr bolatynjınaý jáne syrlaý sehynyń, jabyq turaq pen qoıma bólmelerdiń qurylystary aıaqtalyp qaldy. Birinshi kezekte óndiristiń shektelýi 20%-ǵa deıin bolsa, keıin onyń úlesi arta túsedi. Jobadaǵy jeke ınvestısıa kólemi 15 mlrd. teńgeni quraıdy.
Jumys sapary barysynda qala ákimi jyldyq qýaty 550 myń tonna TQQ-dy óńdeıtin qoqys suryptaıtyn jańa keshen qurylysyn da tekserdi. Qazirgi kezde keshenniń shatyry jasalýda, komýnıkasıa júrgizilýde. Jaqyn arada ornatylǵan ıtalándyq jabdyqtar iske qosylyp, jóndeý jumystary aıaqtalady.
Joba júzege asqanda TQQ suryptalady, tasymaldanady, jumystyń barlyǵy keshendi basqarý júıesi arqyly atqarylady, al polıgonǵa kómý úshin qaýiptiligi tómen jáne bıobuzylǵysh zattar jiberiledi, keıin olardy da óńdeý qolǵa alynady. Qurylys obektisi jeke ınvestısıa esebinen salynýda.
Gazben jumys isteıtin 200 jolaýshy avtobýsyna qyzmet kórsetetin jańa komýnaldy avtobýs parkiniń qurylysy kestege saı júrýde. Negizi nysan men maı quıý stansıasynyń metalkonstýrksıalaryn montajdaý jumystary aıaqtaldy. Qoıma men kólik jýatyn oryndardyń irgetasy quıyldy. «Green Bus Company» tasymaldaýshylarymen jyljymaly sostavty alý máseleleri talqylanýda.
