Halyqty turǵyn úımen qamtýdyń Prezıdent usynǵan jańa baǵdarlamasyna Almaty turǵyndary qalaı qatysyp jatyr? 

Qazaqstan Prezıdenti Nursultan Nazarbaev 2018 jyldyń 5 naýryzynda Qazaqstan halqyna “Prezıdenttiń bes áleýmettik bastamasy” atty úndeýin joldaǵan edi. Alǵashqy bastama – árbir otbasyǵa baspana alýdyń jańa múmkindikterin berý.

Osy maqsatta “7-20-25” turǵyn úı baǵdarlamasy usynyldy. Bul baǵdarlama boıynsha ıpotekalyq nesıeniń jyldyq mólsherlemesi 7%-ten aspaıtyn, bastapqy jarnasy 20%-ke deıin jáne nesıe óteý merzimi 25 jylǵa deıin bolady.

Aýmaqtyq memlekettik organdardyń málimetinshe, qazirgi kezde “Qazaqstannyń turǵyn úı qurylys jınaq bankiniń” Almatydaǵy bólimshelerinde osy baǵdarlamaǵa qatysýǵa ótinish berýge keletin azamattardyń qatary birneshe ese ósken. Sol sebepti uzyn-sonar kezek azaıar emes.

Baǵdarlama iske qosylǵaly beri banktiń Almatydaǵy bólimsheleri kúnine 1500-den astam klıentti qabyldaıdy. Bul jaǵynan Almaty elimizdiń ózge óńirlerinen alda.

Almatyda osy baǵdarlama boıynsha keńes beretin jáne qujat qabyldaıtyn 8 mobıldi top qurylǵan. Baılanys telefondary: 8 701 186 73 34, 8 777 188 20 88. Bank saıty arqyly keńesshilerge habarlasýǵa bolady. “7-20-25” ıpotekalyq baǵdarlamasy boıynsha qurylǵan mobıldi toptar da ázirshe tek Almatyda jumys isteıdi.

Jańa turǵyn úı baǵdarlamasyna “SentrKredıt banki”, “Halyq banki”, “Eýrazıa banki”, “ATFBank”, Bank RBK pen “Sesnabank” ta seriktes ekenin aıta keteıik.

Buǵan qosa, “7-20-25” jáne “Nurly jer” baǵdarlamalary boıynsha aqparatty QR Investısıalar jáne damý mınıstrliginiń Qurylys jáne turǵyn úı-kommýnaldyq sharýashylyq ister komıteti resmı saıtynan, “Elektrondy úkimet” portalynan, QR Ulttyq banki resmı saıtynan jáne buqaralyq aqparat quraldarynyń sońǵy materıaldarynan tabýǵa bolady.

Eske sala keteıik, buǵan deıin “7-20-25” baǵdarlamasy boıynsha alǵashqy jeti ıpoteka 4 shildede Almaty, Astana, Aqtaý, Oral jáne Óskemen qalalarynda berilgenin habarlaǵan edik.