Horvatıa prezıdenti Kolında Grabar-Kıtarovıchti Reseıde ótken fýtboldan Álem chempıonatynan keıin búkil álem tanydy. Jaı ǵana tanyp qoımady, tamsandy, ǵashyq boldy, qyzyǵa da, qyzǵana da qarady. Árıne, óz eliniń komandasyn qoldaý úshin qarapaıym jolaýshylarmen birge Reseıge ushyp barǵan memleket basshysyn kim qurmettemes? Bizdiń endigi áńgimemiz jurt súısingen prezıdenttiń balalyq shaǵy, armandary, jalpy ómiri jaıly bolmaq.
Sheteldik derekkózderge sensek, Kolında Rıeka qalasynda týǵan eken, alaıda balalyq shaǵyn týǵan qalasyna jaqyn aýylda ótkizgen. Otbasynyń qystaǵy men et dúńgirshegi bolypty.
Kolında bala kúninde stúardessa bolýdy armandaǵan. Qyzdarynyń bort serigi bolamyn degen nıetin ata-anasy da qoldady. Alaıda laıyqty bilim alýyn talap etti. 17 jasynda Kolında AQSH-qa oqýǵa attanady, keıin Zagreb ýnıversıtetine oqýǵa túsedi.
Prezıdenttik saılaýǵa qatyspastan buryn parlamentte jumys istedi, syrtqy ister mınıstri boldy ári Horvatıanyń AQSH-taǵy elshisi qyzmetin atqardy.
46 jasynda Kolında álem tarıhyndaǵy alǵashqy áıel prezıdent qana bolyp qoıǵan joq, búgingi tarıhtaǵy eń jas memleket basshysy atandy.
«Horvatıanyń gúldenetinine eshkim kúmándanbaıtyn bolady»
Grabar-Kıtarovıchtiń memleket basshysy laýazymyndaǵy alǵashqy frazasy osy boldy.
Kolında el basqaryp otyrǵan prezıdent qana emes, eki balanyń anasy. Kishi ulynyń aty – Lýka, al qyzy – Katarına.
17 jasynda Kolında mánerlep syrǵanaýdan ıýnıorlar arasynda chempıon boldy.
Ol aǵylshyn, ıspan jáne portýgal tilderinde erkin sóıleıdi. Italán, fransýz, nemis tilderin de azdap meńgergen.
2017 jyly Forbes jýrnalynyń deregi boıynsha, Grabar-Kıtarovıch álemdegi eń laýazymdy áıelderdiń kóshin bastady.
Mynadaı bir qyzyqty derekter kezdesedi. Ár eldiń basshylarymen kezdesý barysynda Kolında Horvatıa fýtbol klýbynyń fýtbolkasyn syıǵa tartady.
Al horvattardyń ózi Kolındany halyq prezıdenti dep sanaıdy. Nege deseńizder, ol turǵyndarmen asqanalarda qarapaıym tamaqtardy jeı beredi.
Qoǵamdyq kóliktermen jıi júredi. Azyq-túlik alý úshin bazarǵa ózi barady.
Bárimizge belgili, Álem chempıonatyna prezıdent qarapaıym jolaýshylar ushaǵymen barǵan bolatyn. Komandasyn qoldaý úshin ulttyq sımvoldy fýtbolka kıip, jankúıerlerimen birge otyryp, chempıonatty tamashalady.
Tipti VIP-aımaqta da ústinen ulttyq fýtbolkasyn sheshpedi.
Horvatıa quramasy chempıon bola almasa da, prezıdent komandanyń ár oıynshysyna jeke-jeke alǵys aıtyp shyqqan.
Mine, naǵyz halyq basshysy osyndaı bolsa kerek-ti. Qaıran qalasyń, tamsanasyń, súısinesiń...
