Urlyq jasaǵandarǵa jazany qataıtyp, azamattarǵa travmatıkalyq qarý ustaý quqyǵyn qaıtarý qajet jáne polıseılerdiń jalaqysy kóterilsin. Almaty qalalyq qoǵamdyq keńes músheleri osyndaı usynys kóterdi.

Quqyq qorǵaý organdarynyń jumysyn qaıta qaraýǵa Denıs Tenniń avtokólik urylarynyń qolynan qaza tabýy túrtki boldy. Tártip saqshylarynyń sózinshe, jyl basynan beri alyp shaharda 20 myń urlyq deregi tirkelgen. Anyǵy, búgingi tańda onyń tek tórtten biri ǵana ashylǵan.  

«Polısıa qyzmetkerlerine barlyǵyn artyp qoıǵymyz kelip otyrǵan joq. Olar úlken jumys atqarady. Jumystary ońaı emes. Qyzmeti barysynda óz ómirin sarp etip jatady. Degenmen, qalada tirkelgen qaıǵyly oqıǵa bul jumysta áli de kemshin tustar bar ekendigin kórsetip otyr», – dedi Almaty qalasy Qoǵamdyq keńesiniń tóraǵasy Rahman ALSHANOV.

Qoǵamdyq keńes otyrysy mánerlep syrǵanaýdyń has sheberi Denıs Tennniń óliminen keıin ótkizilip otyr. Dańqty sportshy 19 shildede qaza tapqan edi. Sochı Olımpıadasynyń júldegerin Almatydaǵy Qurmanǵazy jáne Baıseıitov kósheleriniń qıylysynda eki kúdikti pyshaqtap ketti. Úsh lıtrdeı qan joǵaltqan sportshy Ortalyq aýrýhananyń jan saqtaý bóliminde qaıtys boldy.

Qazir qylmysqa qatysy bar eki azamat ustalyp, tergeý júrgizilýde. Qazaqstan baıraǵyn san márte kókte jelbiretken tanymal sportshymen qoshtasý rásimi 21  shildede Balýan Sholaq atyndaǵy sport kesheninde ótti. Aqtyq saparǵa shyǵaryp salý rásimine kelgen qaraqurym halyq kóp boldy. Shamamen, qaraly jıynǵa 15 myńnan astam adam jınaldy.