Almatyda zeınetkerler de eńbek etýi múmkin.

Búgin Medeý aýdany ákimdigi alǵash ret egde jastaǵy qarttarǵa jumys jármeńkesin ótkizdi. Óıtkeni, boıynda qýaty bar zeınettegiler úıde otyrǵannan góri, qyzmet etkendi qalaıtyn kórinedi. Bul joly ájeler men atalarǵa 35 kompanıanyń ókili jumys usyndy. Ásirese, naryqta medısınalyq qyzmetkerler, tárbıeshiler, repetıtorlar men satýshylar jetispeıdi.

Aıta keteıik, bir ǵana Medeý aýdanynda 27 myń zeınetker bar. Onyń 3 myń 300-i qoǵamdyq jumysqa belsendi at salyssa, 800-den astam qart kúndelikti tegin sport úıirmelerine qatysady. 

«Kúsh-qýaty, qaıraty qoǵamnyń ekonomıkasyn, qoǵamnyń tıisti salasyna jumsaýǵa ábden múmkin. Sondyqtan da, bul jerde ózderimen de sóılesken kezde, báriniń aıtatyny úıde otyrǵylary kelmeıdi. Kerisinshe, bir jumyspen aınalysyp, qoǵamǵa paıda ákelsek eken. Osy bizdiń tájirıbemizdi qazirgi jastarǵa urpaqtar sabaqtastyǵy aıasynda berip ketsek eken deıdi», – dedi Almaty qalasy Medeý aýdany ákiminiń orynbasary Ǵanı Maılybaev.

«Ózimniń jasym qazir 66-da. 10-shy jyly zeınetaqyǵa shyqqanmyn. Qazir jumys istegim keledi. Sondyqtan osy jaqqa kelip, jumys izdep jatyrmyn. Úıde otyrýdan jalyǵyp kettim. Sondyqtan kishkene jumys istegim keledi», – deıdi zeınetker Kúlmaraı Qajenova.