Almaty qalasynyń ákimi Baýyrjan Baıbek Shveısarıanyń Federaldy keńesshisi, Ekonomıka, bilim jáne zertteý federaldy departamentiniń basshysy Iohann Shnaıder-Ammannmen kezdesti.

Taraptar saýda-ekonomıkalyq baılanystardy nyǵaıtý, startaptardy qoldaý jáne «Smart city» jobalaryn júzege asyrý máselelerin talqyǵa saldy. Shveısarıa Qazaqstannyń úshinshi iri sheteldik ınvestory ekenin eskersek, ekijaqty taýar aınalymynyń aýqymy da jyl saıyn artyp otyr dedi bas qosqan delegattar. Aıtalyq, Almatyda saýda, medısına, qarjy jáne basqa salalar boıynsha shveısarlyq kapıtalmen 94 kásiporyn jumys isteýde.  

«Biz Qazaqstanǵa túri sala bıznesmenderin ertip, úlken delegasıasymen keldik. Sapardyń basty maqsaty – burynnan bar seriktestik qatynasty nyǵaıtý jáne jańa yntymaqtastyqty qalyptastyrý. Shveısarıada paıdaly qazbalar joq, sondyqtan el ekonomıkasy jańa tehnologıalarǵa jáne qyzmet kórsetýge negizdelgen. Almaty – jedel damyp kele jatqan megapolıs, basty áleýeti startaptardy damytýǵa baǵyttalǵan. Qalanyń geografıalyq ornalasýy, damyǵan ınfraqurylymy Almatyny búkil Orta Azıa óńiri boıynsha bıznesmenderdiń qyzmetin keńeıtýdiń aıshyqty alańyna aınaldyrady» – dedi Shveısarıa konfederasıasynyń   federaldy keńesshisi Iohann Shnaıder-Ammann.