Elimizde balalar aqparattyq tehnologıa negizderin tereńdetip meńgermek. Osy maqsatta respýblıka boıynsha bir myń IT-synyby ashylatyn bolady. Almatyda ashylǵan ortalyq qyzmetimen «Nur Otan» partıasynyń hatshysy Tamara Dúısenova da tanysyp, oqýshylardyń qarym-qabiletine óz baǵasyn berdi.  

Bul besinshi synyp oqýshysynyń qolynan shyqqan týyndy. Ol dárini qabyldaý ýaqytyn eske salatyn gadjet oılap tapqan. Jas ónertapqysh bul salaǵa burynnan qyzyǵady. Endi túrli jobalaryn qalada arnaıy qurylǵan IT-synybynda júzege asyra alady. Oqýshylar saraıynda ashylǵan orynda oqýshylar aqparattyq tehnologıa negizderin jan-jaqty aqysyz meńgere alady.

«Bul negizi IT-synyp dep atalady. IT-synypta robototehnıka sabaqtary, logıka jáne matematıka sabaqtary ótiledi. Qazirgi tańda bizde jas balalar mine 3-shi jáne 5-shi synyp aralyǵyndaǵy oqýshylar  IT lagerge kelip qatysyp otyr. Bulardyń negizgi ótip jatqany ol robototehnıka negizi, logıka programmalaýdaǵy jáne matematıka», – dedi Almaty qalasy Oqýshylar saraıynyń robototehnıka muǵalimi Áset Muhammad.

IT lager tańǵy saǵat 9-dan bastap túski ýaqytqa deıin qyzmet kórsetedi. Osy ýaqyt aralyǵynda mundaı sabaqtan bólek, ınteraktıvti synypta da bilimin jetildire alady. Atalǵan ortalyq arqyly qaladaǵy 200-den asa mektepke habar taratýǵa múmkindik bar.

Jańa oqý jylynda qalada taǵy osyndaı 79 IT-synyp ashylmaq. Negizgi oqytý baǵdarlamasynan bólek, halyqaralyq bilim úlgilerin qoldaný qarastyrylǵan. Zamanaýı synyptar «Nur Otan» partıasynyń «tegin myń IT-synyp» jobasy aıasynda ashylýda. Iaǵnı, 2020 jylǵa qaraı elimizdegi 7 myń bilim oshaǵynda osyndaı bólmeler jumys isteıdi.

«Bizdiń maqsatymyz balalardyń bári programmıst bolsyn, ınjener bolsyn emes. Erteń osy mektepti oqyp shyqqannan keıin myna aqaparattyq keńistikte ózderin erkin ustaýǵa múmkindigi bolsa deımiz. Sebebi, qazirgi tańnyń ózinde ınternetke kiretin bolsaq nemese basqa da sıfrlyq prodýktylerdi qoldanatyn bolsaq, qoldanýda kóp kemishilikter jiberemiz. Sondyqtan qazirden bastap balalardy osy jańa aqparattyq jahandanýǵa beıimdeý máselesin qarastyryp otyrmyz», – dedi «Nur Otan» partıasynyń hatshysy Tamara Dúısenova.

Almatyǵa jumys saparymen kelgen Tamara Dúısenova Jambyl atyndaǵy jasósipirimder kitaphanasynda boldy. Kúrdeli jóndeýden ótkizilgen oryn qazir jańa formatta jumys istep otyr. Iaǵnı, oqyrmandar munda tek kitap oqyp qana qoımaı, óz jobalaryn, ıdeıalaryn talqylaı alady. Bul ortalyq «Rýhanı jańǵyrý» baǵdarlamasy aıasynda jańǵyrtylǵan bolatyn.

«Burynnan ózimizdiń 15 myń oqyrmanymyz bar. Olardy qaıta tirkeý jumystary júrgizilip jatyr. Jańadan jazylǵan oqyrmandar sany osy 3 aıdyń ishinde 7 myńnan asty», – deıdi Jambyl atyndaǵy jasóspirimder kitaphanasy basshysynyń mindetin atqarýshy Ǵazıza Qudaıbergen.

Odan bólek, osydan 9 aı buryn ashylǵan túrli úıirme men óz ıdeıalaryn damytýǵa arnalǵan Smart.Point kovorkıng keńistiginiń jumysymen tanysty. Onda joǵary tehnologıalar men kreatıvti bıznes salasynda jumys isteıtin 40-qa jýyq kompanıa ornalasqan. Atap óterligi, nysan aptanyń jeti kúninde 24 saǵat boıy qyzmet kórsetedi.