Budan-bylaı áleýmettik medısınalyq saqtandyrý júıesi jaıly almatylyqtardy mazalaǵan san saýalǵa qalalyq ákimdiktiń Qoǵamdyq qabyldaý bólimi mamandary jaýap beredi.
Mamandar «Ashyq Almaty» mekemesinde ár beısenbi saıyn qabyldaıdy.
«Bizge kelgen azamattardyń kóbi medısınalyq saqtandyrý boıynsha tólenetin jarnanyń kólemi, aýdarylǵan qarajattyń qaıda saqtalatyny, ony qaıtaryp alýǵa bolatyny týraly saýaldarmen júginedi. Budan bólek, bizdiń uıym emhanalarǵa tirkelý máselesin, tegin medısınalyq kómektiń kepildendirilgen kólemi aıasynda jumys isteıtin mekemeler boıynsha turǵyndarǵa keńes beremiz», – dedi «Áleýmettik medısınalyq saqtandyrý qory» KEAQ Almaty qalasy boıynsha bólimshesiniń bólim jetekshisi Áıgerim Súıinbaeva.
Qazir jumys berýshiler ǵana jańa júıege aılyq tabysynyń 1 jarym paıyzyn jarna retinde tólep otyr. Ótken jyldyń 1-shi shildesinen beri Almaty qalasy boıynsha mindetti áleýmettik medısınalyq saqtandyrý júıesine 17 mıllıard teńgeden astam jarna túsken. Bul respýblıka boıynsha qorǵa quıylǵan jalpy qarjynyń 20 paıyzy. Al 2020-shy jyldan bastap barlyq toptaǵy azamattar aılyq tabystarynyń belgili bir mólsherin jarna retinde quıyp otyrýlary shart.
