Almatydaǵy eski úılerdi súrý josparly túrde jalǵasady. Qala ákimi Baýyrjan Baıbek, tozyǵy jetken baspanalar baǵdarlamasy men aýlalardy abattandyrý, sondaı-aq, qalanyń birqatar dańǵyldaryn jańartý barysymen tanysty. Jaqyn arada Súleımenov pen Jandosov kóshesiniń qıylysynda ornalasqan 50-shi jyldarda salynǵan úılerdi súrý jumystary bastalmaq. Al ol úılerdegi turǵyndarǵa ýaqytsha panalaıtyn páter berilmek. Sol aralyqta dál sol aýmaqqa jańa kópqabatty turǵyn úı salynady. Bas-aıaǵy tozyǵy jetken 44 úı súriletin bolady. Oǵan qosa, Raıymbek dańǵyly boıyndaǵy 2,7 ga jerge ornalasqan eki qabatty apatty úı de súriledi. Jalpy, aldaǵy jyldary eski jáne apatty jaǵdaıdaǵy 500 úı buzylyp, olardyń ornyna 1,2 mln. sharshy metr aýmaqty qamtıtyn baspanalar boı kótermek.
«Eski úılerdi súrý jumysy bárine de paıdaly bolmaq. Jumys oryndary ashylady, olardan salyq tólenedi, tehnıkalar jumys isteıtin bolady, sizderge de jaqsy. Bári de zań aıasynda atqarylady. Ár adamnyń jaǵdaıy eskeriletin bolsyn. Bir jyl shydasańyzdar boldy», – dedi Almaty qalasynyń ákimi Baýyrjan Baıbek turǵyndarmen kezdesý barysynda.
Jumys sapary barysynda qala ákimi Áýezov aýdanyndaǵy jańarǵan aýlalardy kórdi. Onda bıyl 65 aýla jóndelgen edi. Byltyr qalada 500 aýla jasalsa, osy jyly taǵy da 600 aýla jańarmaq. Aýla kelbetin ózgertý barysynda balalar jáne sport alańdary, trenajer jáne oıyn keshenderi paıdalanýǵa beriledi. Olardyń edenderine asfált jáne rezına tóselip, oryndyqtar men qoqys jáshikteri qoıylady. Shahar basshysy qalanyń tarıhı ortalyǵyn jańartýǵa qatysty júrip jatqan qurylys jumystarynyń qarqynyn da nazardan tys qaldyrmady. Búginde Abaı, Abylaı han, Nazarbaev dańǵyldary men Abaı alańyndaǵy ınjenerlik jelilerdi qaıta júrgizý jumystary qolǵa alynýda. Onda tas tóseý, jaryq baǵanalaryn, sýarý júıelerin aýystyrý, kire berister men nysannyń syrtqy kelbetin ózgertý jumystary qyza túsken. Qaıta jóndeý barysynda júrginshi aımaǵy keńeıedi, kóleńkeli keńistikke jasyl jelek otyrǵyzylyp, sý jańa sýburqaqtar salynyp, keıbiri qaıta jańartylady.
