Almatyda ótken dástúrli alpınıadaǵa bıyl 5000-nan astam adam qatysty. Teńiz deńgeıinen 4 myń 376 metr bıiktikte ornalasqan «Nursultan shyńyn» 200-den astam adam baǵyndyrdy. Osy jyly buqaralyq sporttyq shara Astananyń 20 jyldyǵyna arnaldy.  

Dástúrli alpınıadaǵa qatysýshylar sany jyldaǵydaı kóp. Tipti, jol boıynda uzyn-sonar kezek te paıda boldy. Shymbulaq aspaly joly demalys kúni tegin qyzmet kórsetti. Qatysýshylar eń aldymen Medeý-SHymbulaq-Talǵar asýy men Bogdanovıch muzdyǵyn baǵyndyrsa, keıin Qazaqstan halqy Assambleıasy shyńyna aıaq iliktirdi, al negizgi núkte Nursultan shyńy boldy.

«Nursultan shyńy» 4376 metr bıiktikte ornalasqan. Oǵan kóterilý úshin álpınıser tańǵy saǵat 5-ten bastap jolǵa attandy. Alpınıadaǵa jas pen jasamys ta, kásibı álpınıs pen áýesqoı sportshylar da qatysty. Arasynda talaı jyldan beri úzbeı kelip júrgenderi de bar.

«Men taýǵa 1956 jyldan beri turaqty túrde shyǵamyn. 81 jastamyn, densaýlyǵymnyń jaqsy bolýyna osylaı álpınızmmen shuǵyldaný áser etti dep sanaımyn. Sondyqtan barlyq azamattardy salaýatty ómir saltyn saqtaýǵa shaqyramyn», – deıdi Valentına Lerıkova.

«Alpınıada – ol tek buqaralyq sportty nasıhattaý ǵana emes, ol álpınızmdi damytý. Máselen, mundaı sharaǵa qatysqan 1000 adamnan, kem degende 3 adam álpınızmge qyzyǵýshylyq tanytyp, úıirmege kelse, sonyń ózi jetistik. Biz úshin bastysy, halyqty taýǵa shyǵýǵa baýlý», – dedi álpınıs Maqsut Jumaev.

Jalpy, buqaralyq sharaǵa bıyl 5 myńnan astam azamat tirkelgen. Sonyń ishinde, «Nursultan shyńyn» 200-den astam sportshy baǵyndyrdy. Qaýipsizdik jaǵyna basa mán berilgen. Taýǵa shyǵý baǵyty boıynda Tótenshe jaǵdaılar komıtetiniń kezekshi-qutqarýshylary, apat medısınasy ortalyǵynyń shatyrly pýnktteri jumys istedi. Odan bólek, arnaıy tikushaqtar da qarastyryldy.

«Bul is-shara degen 1995 jyly Komsomol shyńy dep atalatyn bolatyn. 1998 jyly «Nursultan shyńy» degen atqa ıe boldy. sol 1995 jyldan beri ótip kele jatyr. Aldyńǵy jyly shyńnyń joǵarǵy jerine deıin jetkender sany 293 boldy», – dedi Almaty qalasy Dene shynyqtyrý jáne sport basqarmasy bóliminiń bas mamany Asqat Maqsutov.

Bıylǵy alpınıada Astananyń 20 jyldyǵyna arnaldy. Osy jyldan bastap Fızkýltýrnık shyńy Qazaqstan Halqy Assambleıasy shyńy dep ózgertildi. Ol teńiz deńgeıinen 4068 metr bıiktikte ornalasqan.