Almatyda Astananyń qurdastary marapattaldy. Elordanyń 20 jyldyǵyn toılaǵan saltanatty sharada ákimder ánnen shashý shashty. Arnaıy avtosherý ótip, qaıyrymdylyqtan túsken qarjy muqtaj balalarǵa berildi.

Osydan 20 jyl buryn, 6-shilde kúni ińgálap dúnıe esigin ashqan qyzdyń biri – Alına. Búginde dızaıner mamandyǵy boıynsha oqyp jatqan 2-kýrstyń stýdenti  «Qazirgi jastar jańa tehnologıa, ǵylymǵa qushtar, jańashyldyqqa áýes» - deıdi. Jetisý aýdanyndaǵy eki júz myńdaı halyqtyń ishinen týǵan kúnderi tól merekemen sáıkes kelgen qos qyzǵa aýdan ákimi planshet syılady.

«1998 jyly 6-shilde Astanamen birge dúnıe esigin ashqanbyz. Jalpy elimiz kórkeıip jatyr. Táı-táı basyp jatyr. Astanany týǵan kúnimen shyn júrekten quttyqtaımyn jáne Gúlnur seni de quttyqtaımyn», – deıdi Alına Seıitqyzy. 

«Elbasymen birge bir kúnde týǵanyma óte qatty qýanyshtymyn jáne meni osy kúni dúnıege ákelgen anama myń da bir alǵys aıtamyn. Astana kúni qutty bolsyn! Qazirgi jastar kishkentaı kezinen bastap aqyldyraq jáne de tehnologıaǵa jaqynyraq dep oılaımyn», – deıdi Gúlnur Ǵalymjanqyzy. 

Jetisý aýdanynda shaǵyn kásippen aınalysatyn adam kóp. 10 myńnan astam shaǵyn kásip, 44 iri óndiris oryndary tirkelgen. El ekonomıkasynyń ósýine ózindik úles qosqan bıznes ókilderi de búgingi saltanatty sharada Astananyń 20 jyldyq tósbelgisimen marapattaldy. 

«Qazaqtyń ulttyq oıyndary, arqan tartý taǵy basqalar osynda bizdiń terıtorıamyzda bolyp jatyr. Mende ózim «Atameken» ánimdi arnadym. Qurmetti Jetisý aýdanynyń turǵyndary, almatylyqtar, otandastar barshańyzdy shyn júrekten quttyqtaımyn! Osy Astananyń 20 jyldyǵy barshańyzǵa qutty bolsyn! Jurtymyz tynysh, elimiz aman bolǵaı», – dedi Almaty qalasy Jetisý aýdany ákiminiń orynbasary Vácheslav Vavılın.

Uzaq ómir saltyn sabaqtastyrǵysy kelgen qarıalar saıabaqta sap túzep, jattyǵýlar jasasa, jalaýlatqan  avtosherý de  aýdan halqynyń kóńilin kóterdi. Kólik sherýinen túsken qarjy muqtaj balalarǵa beriledi.