Almaty qalasynda  jeńil relsti kólik jelisi memlekettik jeke menshik seriktestik qaǵıdasy boıynsha iske qosylady. Jobanyń jalpy quny 130 mlrd teńgeni quramaq. Qazirgi tańda eki deńgeıdegi ashyq baıqaýǵa daıyndyq jumystary júrgizilýde. Jeke seriktes moınynda jobalaý, jol salý, jyljymaly quramdy alyp kelý jáne ony iske qosý syndy mindettemesi tur. Qoǵamdyq tasymaldaýshy kólik Almaty Arena kesheni men Saıahat avtovokzaly aralyǵynda qatynaıdy dep kútilýde. Jalpy jeńil relsti kóliktiń úsh quramy bolady.

«Qaı jerde júretin marshrýty belgilengen. 22,7 shaqyrym bolady. Ol qalanyń ortasymen júredi. Qalanyń ákimi aıtqany boıynsha Almaty Arena jaqty sosyn Saıahatty qosady degen. Sol joba 22,7 shaqyrym. Ol Tóle bı kóshesimen júrip, Panfılov kóshesimen tómen túsip, Maqataev kóshesimen burynǵy Jetisý degen aldyndaǵy tramvaı bolǵan jol boıynsha»,-dedi Almaty qalasy jeńil relsti kólik basqarý jobasy boıynsha atqarýshy dırektory Ǵanı Tájıev.

Joba boıynsha kelisimge 2019 jyldyń mamyr aıynda qol qoıylady dep kútilýde. Qurylys jumystary 2 jyl júrgiziledi dep boljanyp otyr.