Almatylyq oqýshylar jaz boıy sýda júzýdi tegin úırenedi. Uıymdastyrýshylar sapasy joǵary degen qaladaǵy alty úlken baseındi tańdap alǵan. Sport basqarmasy qystaı taý shańǵysy men kónkı tebýdi tegin úıretken edi. Qalalyq ákimdiktiń qoldaýymen ótip jatqan shara tamyz aıynyń sońyna deıin jalǵaspaq.

Lúbov pen Anastasıa maltýdy burynnan jaqsy kórsede, aqyly túrde baseınge barýǵa anasynyń qaltasy kótermegen. Tegin kýrstyń ótetinin estigen egiz qyzdy anasy alǵashqylardyń biri bolyp tirkepti.

«Úırengim keledi. Óıtkeni biz teńizge barǵan saıyn qutqarýshylardyń kómegi arqyly ǵana júzem. Sondyqtan úırený kerek maǵanda»,-dedi Anastasıa Sımonenko.

«Sýǵa júzip úırengimiz keledi. Anamyz alyp keldi»,-dedi Lúbov Sımonenko.

Aıdynda jattyqtyrýshy arqyly júzýdiń bir aılyq aqysy Almatyda keminde 15 myń teńgeden bastalady. Osyny eskergen ákimdik sport keshenderine qatysatyn oqýshy sanyna oraı qarjy bólipti. 

«Ázirge áli júzý bilmeımiz. Osyndaı tegin sabaqtardyń baryna óte qýanyshtymyz. Eki egiz qyzymdy buryn baseınge aparmaǵam. Ári jumyssyzbyn. Sondyqtan sabaqtardyń tegin bolýy januıalyq búdjetimizge de jaqsy kómek boldy. Aqyly bolsa ekeýine birdeı tóleý qıyn soǵar edi»,-dedi Olga Polgalova.

Baseınde balyqtaı júzgisi keletin balalarǵa kózildirik, bas kıim, saqtyq keýdeshesi syndy quraldar tegin beriledi. Qatarynan qos jattyqtyrýshy  kishkentaılardy qadaǵalap, qaýipsizdigin qamtamasyz etedi.

«Keıbir balalar sýǵa oınaý úshin keledi. Sýdyń ishinde oqý ońaı emes. Júzýdiń tehnıkalaryn tolyq meńgerýge onsyzda ýaqyt tyǵyz bolǵandyqtan sabaq sál aýyrlaý bolady.  Bir saǵatta shamamen otyz balaǵa deıin qatysady»,-dedi jattyqtyrýshy Vıktor Reshetnák. 

Jazǵy demalysta eki myń balany júzýge úıretý josparlanǵan. Qulshynys tanytqandar qatary kóp bolǵandyqtan basqarma tek  8 ben 12 jas aralyǵyndaǵy balalardyń qatysýyn quptaǵan. Árbir bala bir saǵattan aptasyna úsh márte júzý sabaǵyna kele alady. 

«Almaty qalasy ákimdiginiń qoldaýymen sporttyq almaty baǵdarlamasynyń aıasynda oqýshylardy júzý negizderine úıretý jumystary jalǵasyn taýyp jatyr. Osy bir aıdyń ishinde 702 bala júzý baǵdarlamasy boıynsha oqyp, úırenip ótti»,-dedi "sporttyq almaty" jobasynyń uıymdastyrýshysy Aıdos Bagashev.   

12 sabaqtan soń, qatysýshylar sýda durys dem alý, qalqý, maltý, súńgý, sekirý syndy san túrli ádisterdi meńgeredi. Baseınge balasyn bergisi kelgen buqara sport basqarmasyna aldyn ala tirkelip, sabaqqa týý týraly kýáliktiń kóshirmesin, medısınalyq anyqtama ákeledi. Baseınge barý bitken soń uıymdastyrýshylar sertıfıkat pen medaldardy tabystamaq.