Almatyda dárigerdiń balasy Janur Baıqonysty óltirdi degen kúdiktiniń týystary arty ólimge ákelgen janjaldyń sebebin aıtyp berdi, - dep habarlaıdy Qamshy.kz aqparat agenttigi Tengrinews.kz saıtynyń deregin negizge alyp. 

15 jastaǵy kúdiktiniń týystarynyń aıtýynsha, "Spýtnık" oıyn-saýyq ortalyǵynyń mańyndaǵy janjal jınalmaǵan ydys úshin Janur Baıqonyspen salǵylasyp qalǵannan keıin bastalǵan. 

"Shamamen 10 kún buryn balam akvaparkten keıin úsh dosymen bir dosynyń úıinde túski as ishken. Keıinirek úıge Janur kelip, balalardy óz artynan ydysty jýmaı ketkeni úshin "jazalaǵysy" kelgen. Biraq olar bizdiń úıde de, basqa úıde de as ishedi ǵoı, balalar emes pe", - deıdi kúdiktiniń otbasyndaǵylar.

Olardyń aıtýynsha, nátıjesinde shý shyǵyp, balalar bir-birine judyryq ala júgirgen.

"Ulym 9-synyp bitirgen, al Janur 11-synypty bitirdi. Janur birinshi bolyp, bizdiń balany qulatqan. Keıin balam bizge "Men qalaı ekenin bilmeımin, quladym" dep aıtty. Júregim qazir ekige aıyrylatyndaı. 15 jastaǵy balany qamap qoıdy, barlyq ómiri qurydy. Áldeqaıdaǵy tamaq, ydys úshin... Balalar sondaı ashýshań", - deıdi kúdiktiniń týystary.

Kúdiktiniń otbasynda úsh bala bar eken: tuńǵysh uly men eki qyzy. Kúdikti oqyǵan № 13 mekteptegiler bala jaıly jaǵymdy pikir aıtqan. Sabaǵyn jaqsy oqyǵan, mektepten jıi qalmapty, 9-synyptan keıingi emtıhandaryn 4 pen 5-ke tapsyrypty.

Eske salsaq, Almatyda "Aqsaı" ýnıversıteti klınıkasy bas dárigeriniń orynbasarynyń ulyn bireýler óltirip ketti dep habarlanǵan bolatyn. Keıinirek Almaty polıseıleri kúdiktini ustady, ol kinásin moıyndady.  Marqumnyń muǵalimderiniń aıtýynsha, Janur Baıqonys Almatydaǵy № 173 lıseıde oqyǵan balamen tóbelesken. Ol sabyrly, salmaqty bolǵanyn jáne qytaılyq JOO-ǵa túsýdi josparlaǵanyn, birneshe til biletinin aıtyp otyr. Janur Baıqonys UBT tapsyrýdan bas tartyp, Qytaıǵa ketkisi kelipti. Pedagogtar qaqtyǵys sebebi belgisiz ekenin aıtady.