Almatyda qalanyń barlyq jer asty ótpeli joldaryn kúrdeli jóndeýden ótkizý jumystary aıaqtalýda. Megapolıs ákimi Baýyrjan Baıbek jumys sapary kezinde jaıaý júrginshi ınfraqurylymyn rekonstrýsıalaý qarqynyn tekserip, jańarǵan jer asty ótpeli joldardy qarap shyqty.

Jańarǵan jer asty ótpeli joldarǵa dıodty jaryq kózderi men qozǵalys qurylǵylary, mýzyka shyǵaratyn dybys dınamıkalary ornatylǵan. Ótpeli joldardyń tóbeleri arnaıy janbaıtyn materıaldardan jasalǵan, qabyrǵalary ashyq ádemi sýrettermen bezendirilgen.

Mysaly, Abaı men Abylaıhannyń burylysyndaǵy jer asty ótpeli joldyń qabyrǵalaryna qazaq aqyny jáne aǵartýshy Abaı Qunanbaevtyń naqyldary jazylǵan. Respýblıka Saraıyna qarsy ornalasqan jer asty ótpeli joldyń qabyrǵasynda «Jeti qazyna» atty qazaq kóshpendisiniń jeti baılyǵy kórinis tapqan.

«Qaýipsizi qala» baǵyty aıasynda jer asty ótpeli jolǵa jańa sıpattaǵy birneshe vıdeokameralar ornatylǵan. Olarda júzderdi anyqtaıtyn múmkindikter bar ári aýdandyq ishki ister basqarmalarynyń baqylaý júıelerine qosylǵan.

«Bıylǵy jyly 160-tan astam kóshe jóndeýden ótti jáne 600-den astam aýla abattandyrylady. Qalanyń tarıhı ortalyǵy modernızasıalanýda. Tek sońǵy jyly ǵana 800 kılometr ınjenerlik jeli jańardy. Árıne, jóndeý jumystarynyń qala turǵyndaryna jaısyzdyq týdyrýy múmkin. Men olardan sál ǵana shydamdylyq tanytýdy ótinemin. Kóshelerge rekonstrýksıa júrgizý kezinde qurylys erejesin saqtamaǵan birqatar iri qurylys uıymdary aıyppul tóledi. Barlyq jumystar sapaly ári qysqa merzimde aıaqtalady. Keıin osy qurylys kompanıalary «qurylys mádenıetin» ıgerip, jóndeý jumystaryn qala turǵyndaryna bildirmeı júrgizetin bolady», - dep atap ótti Baýyrjan Baıbek.