Almaty ákimi Baýyrjan Baıbek kún saıynǵy jumys sapary barysynda qala aýlalaryn rekonstrýksıalaý qarqynyn tekserdi. Eger megapolıste 2016 jyly 300 aýla kóriktendirilse, 2017 jyly 400-ten astam aýla jóndeldi, al bıylǵy jyly 600-den astam aýla kúrdeli jóndeýden ótýde. Sońǵy úsh jylda 3787 almatylyq aýlanyń 1338-i abattandyryldy.

Aýlalarda jańa sport jáne balalar alańdary jasalýda, baldyrǵandardyń sportpen shuǵyldanýy úshin trenajerler, oıyn keshenderi ornatylýda. Asfáltty jáne rezınkaly edender qaıta jasalyp, oryndyqtar, ýrnalar men MAFtar qoıylýda, jasyl jelek kóbeıýde.

«Qaýipsiz qala» baǵytynda jańa jaryq kózderi ornatylýda. Keıbir aýlalarda pılotty rejımde jaryq kózderi kún energıasymen jumys isteýde. Bolashaqta ózge aýlalardy jóndeý barysynda ony keńinen qoldaný múmkindigi qarastyrylýda.

Qala basshysy jumys sapary kezinde «Orbıta-1» yqsham aýdanyndaǵy №16, 17, 18, 19, 2, 21 úıler turǵyndarymen kezdesti, munda jańa hokeı, fýtbol alańdary paıda bolǵan, kedergisiz ınklúzıvti oıyn alańy jasalǵan.

«Biz aýlalardy kóp jóndegen saıyn nege bizdiń aýlamyzdy jóndemeısizder degen ótinimder jıi túsýde. Men árbir almatylyq aýlanyń jóndeýden ótetinine ýáde beremin. Ol úshin biz bólek baǵdarlama qabyldadyq jáne úsh jyl ishinde 700 myń adamdy qamtyǵan aýlalardyń 35%-yn jańarttyq. Biz úshin bul mańyzdy, qalalyqtar úshin qaýipsizdik pen jaılylyq. Bizdiń aýlalarymyz jaryq kózderi, sport jáne balalar alańdary bar tartymdy aýla bolýy tıis, munda balalar sportpen shuǵyldanyp, ashyq aspan astynda oınaı alady», - dep atap ótti Baýyrjan Baıbek.

Bulardan ózge, jyl aıaǵyna deıin TÚK modernızasıalaý aıasynda taǵyda 174 úıdiń syrty, shatyry, podezderi jóndeledi, 226 lıft aýystyrylady.

Jalpy, Almatyda sońǵy úsh jyl ishinde uzyndyǵy 500 km bolatyn 524 kóshe jóndeldi. Tek sońǵy jyly ǵana 800 km ınjenerlik jeliler salyndy jáne qaıta jasaldy.

Qalanyń tarıhı ortalyǵyn jańǵyrtý jalǵasýda. Eger ótken jyly Panfılov, Jibek joly, Gogol, Qabanbaı batyr, Tólebaev, Baıseıitova kósheleri men «Astana» alańy qaıta jasalsa, bıylǵy jyly Abaı, Abylaı han, Dostyq, Nazarbaev, Jeltoqsan dańǵyldary, «Almaty 2» temirjol vokzalynyń alańy jáne Respýblıka Saraıynyń aldy jańarý ústinde.