Qyrkúıekte Almatyda 16 myń ıntellektýaldy kamera iske qosylady. Beınebaqylaýdyń osyndaı tıimdi tásilin polıseıler aldymen Almaly aýdanynda synaqtan ótkizdi. Pılotty joba nátıjeli shyqqan soń, endi búkil qalany qamtymaq.
Jaqynda Almatydaǵy árbir aýdandyq ishki ister basqarmalarynyń aýmaǵyndaǵy aýlalardaǵy tártipti kezekshi polıseı monıtor arqyly baqylaıdy. Jýyq arada ol úshin qosymsha kameralar ornatylsa, qazir istep turǵandary ıntellektýaldy júıege qosylady. Bul bir mezette sapaly kadrdy onlaın rejımde alýǵa jáne kúdik týdyrǵan seziktiniń áreketin polısıa bólimindegi jedel basqarý ortalyǵy arqyly baqylaýǵa múmkindik beredi.
Aqyldy júıeniń múmkindigin bir jyl buryn Almaly aýdanynyń polıseıleri alǵashqy bolyp túsingen. Pılotty jobaǵa jergilikti İshki ister departamentiniń 1500-ge jýyq kamerasy qosylypty. Aıta keteıik, olardyń qatarynda buǵan deıin de ornatylǵandary bar. Mamandardyń aıtýynsha, tehnıkalyq kómekshiniń obektıvi qorǵalǵan aımaqtaǵy jańadan paıda bolǵan ózgeristi birden sezedi eken.
«Máselen, adamdar qapshyǵyn nemese sómkesin bir jerde tastap ketse, kameranyń nazaryn birden ózine aýdarady. Sodan keıin bizge ol týraly belgi beriledi. Ol dybystyq nemese beıne túrinde de bolýy múmkin. Aýlalardaǵy jaǵdaıǵa kelsek, onda kamera arqyly belgilenbegen jerge qoqys tastap, kólikterin qalaǵan jerge qoıyp, joldy bógeıtinderdi kórýge bolady», – dedi Almaty qalasy IID tehnıkalyq qyzmet basqarmasynyń basshysy Olga Agafonova.
Al birneshe aptadan keıin smart júıe barlyq aýdandyq İshki ister basqarmalaryndaǵy tártip saqshylarynyń jumysyn jeńildetedi. Sol qaladaǵy 16 myń kamera túsirip jatqan beınekadrlar bir mezgilde bir ekranǵa syıyp ketedi. Osylaısha, ýchaskelik ınspektorlar de planshet arqyly aýdandy tolyq baqylaýda ustaı alady.
«Qazir İshki ister departamenti birneshe jańa jobalardy qolǵa alyp jatyr. Olar «Saraptama» jáne «Jolaq» dep atalady. Sońǵysy tek avtobýstarǵa arnalǵan syzyqtardaǵy jol erejelerin buzatyn jeńil kólikterdi baqylaıdy. Oǵan qosa, halyq kóp jınalatyn oryndarda taǵy myńǵa jýyq kamera ornatý kózdelip otyr. Qazir shamamen, ondaı jerlerde 500-deı kamera kúni-túni istep tur. Áleýmettik mańyzy bar nysandar: mektepter men emhanalarda da kameralar bar», – dedi Almaty qalasy İİD resmı ókili Saltanat Ázirbek.
Qazir Almaty tirshiligi 118 myńnan asa kameranyń nazarynda. Onyń 93 paıyzyn jergilikti halyq óz qarjysyna ornatqan. Ol «Qaýipsiz qala», «Qaýipsiz aýla» sekildi baǵdarlamalar aıasynda júzege asyp otyr. Máselen, Almatyda ótken jyly kameralar kómegimen 2500-den asa qylmys ashylyp, kóptegen jol erejelerin buzý derekteri tirkelgen.
