Almatydaǵy Túrksib aýdanynda qarqyndy túrde gaz qubyrlary tartylýda. Qazirgi tańda aýdan 98 paıyzǵa gazben qamtylǵan.
Bıyl da osy baǵyttaǵy jumys jalǵasyn taýyp otyr. Bul jumystar osy jyldyń aıaǵyna deıin tolyǵymen aıaqtalýy múmkin.
Jalpy aýdandaǵy barlyq turǵyn 2019 jylǵa deıin kógildir otynmen tolyq qamtamasyz etilmek.
Túrksib aýdanynda búgingi tańda 1485 úı tabıǵı gazǵa qosylmaǵan. Kógildir otyn kelmegen jeke turǵyn úıdiń basym bóligi Álmerek yqshamaýdanynda ornalasqan. Pesh jaǵyp kúneltip kelgen turǵyndar endi bul kúnderdiń artta qalatynyna áli sene alar emes.
«Bul jerde turyp jatqanyma 37 jyl boldy. Osy kúndi kútkenimizge kóp jyl boldy. Jan-jaǵymyzdyń bárinde gaz bar. Tek bizde ǵana joq edi. Endi bizdiń jaǵdaıymyzdy túsinip, bıyl gaz ótkizip jatyr. Rahmet!», – dep rızashylyǵyn bildirdi turǵyn Shaǵıpa Tólendınova.
«Kómir jaqqan ońaı deısiń be, balam? Úıde kelinim ot jaǵady. Ózim aýyr eshteńe kótere almaımyn. Endi gaz qosylsa, kómir jaǵyp, qınalyp júrmeıtin boldyq. Qudaıǵa táýbá dep qýanyp otyrmyz», – deıdi taǵy turǵyn Gúlnar Tileýbaeva qýanyshymen bólisip.
Álmerek yqshamaýdanynda gazdandyrý jumysy shilde aıynyń basynda bastalǵan. Kún sýytsa mazasy qashatyn jurt jylytý maýsymy bastalǵansha tabıǵı gazben qamtylatyn bolady. Yqshamaýdan turǵyndary gaz júrgizetin kompanıaǵa naýryz aıynda júginipti. Búginde 600 úımen kelisim-shart jasalǵan. Oǵan qosa, múgedek jáne zeınetker azamattardyń qosylýyna jeńildikter qarastyrylǵan.
«Bári 150 myń teńge turady. Onyń ishine bári kiredi. Múgedekter men zeınetkerlerdi jeke qaraımyz. Kómegimiz bar. Bir jyldyq bólip tóleý merzimi bar», – dedi merdiger kompanıanyń bas dırektory Jadyrasyn Báken.
«Endi gaz qosylmaǵan 385 úı qaldy. Biraq ol jaqqa da gaz tartylyp qalar. Qazir qazan aıyn kútpip jatpaı-aq, merdiger kompanıamen sóılesip jatyrmyz, olar da taǵy da qosymsha adamdar qosyp, jumysty ary qaraı jalǵastyrady», – dedi Almaty qalasy Túrksib aýdany Komýnaldyq sharýashylyq bóliminiń basshysy Aıdos Beketaev.
Túrksib aýdanynda jalpy, 25 myńǵa jýyq jeke turǵyn úı bar. Sonyń 98 paıyzy gazben qamtylǵan. Jyl aıaǵyna deıin Túrksib aýdany tolyǵymen gazdandyrylady.
