Almatyda qarttardyń densaýlyǵyn ońaltatyn ortalyq ashyldy. Onda qant dıabetimen syrqattanǵan jáne este saqtaý qabileti buzylǵan zeınetkerlerge em jasalady. Tórt mezgil tegin tamaq taratylyp, zeınette zerikken qarıalarǵa barlyq jaǵdaı jasalady. Tek kúndiz ǵana jumys isteıtin saýyqtyrý mekemesine joldama alý úshin qandaı qujattar qajet?  

Zeınetten soń zerigip, qoǵamnan bóline bastaǵan qamkóńil qarıalarǵa qoldaý kórsetý úshin qalada taǵy bir erekshe ortalyq iske qosyldy. «Uzaq ómir súrý» jobasy aıasynda ashylǵan mekemede qant dıabetiniń ekinshi túrimen  aýyratyn jáne este saqtaý qabileti buzylǵan qarttarǵa em kórsetiledi. Egde jastaǵy adamdar bóbekjaıǵa kelgen balalardaı, kúnde tańǵy saǵat 9-dan túski 3-ke deıin osy ortalyqta ýaqyttaryn ótkizedi. Olar túrli emdik jattyǵýlar jasap, dárigerler men psıhologtardyń kómegine júgine alady. Al zerikkisi kelmeıtinder degenderi án salyp, qolónermen shuǵyldanady.

«Ortalyqty ózimizdiń emhanadan estidim. Olar maǵan joldama berdi, joldamany ortalyqqa ótkizdim. Ortalyq 5 kúnnen keıin osy jerden «Sizdiń qujattaryńyz tústi, bizge qabyldaýǵa kelińiz» qońyraý shaldy. Osy ortalyqqa kelgeli beri salmaǵym da burynǵy mólsherine kelip jatyr. Uıqym jaqsy, qan qysymym túse bastady», – deıdi zeınetker Qanat Tileýjanov.

«Bul jerde úıdiń sharýasynan, bala-shaǵadan, qazan-aıaqtan azdap qolyń bosaıdy. Munda qatarlastarymyzben kóńil bólisip, áńgime aıtysyp, jastyq shaqty eske alysamyz. Bul jerde dıetamen de emdelýge bolady. Densaýlyǵym jaqsardy, qan qysymym kóterilmeıdi, dári ishpeımin.Zeınetker óz densaýlyǵyn ońaltýdy úırenedi», – deıdi Jaqsygúl Bertagına.

Qarttar ortalyqqa kelip, ońalǵany úshin qaltalarynan bir tıyn da tólemeıdi. Olardy úılerinen tasymaldaý úshin kólik te qarastyrylǵan. Erekshe kútimdi qajet etetin syrqatpen aýyratyndyqtan, kelýshilerge 4 ret dıetalyq tamaq beriledi. Zeınetkerlerdi kúndiz qabyldaý ortalyǵynda 56 adamǵa oryn qarastyrylǵan. Munda qarttardyń qas-qabaǵyna qarap, bar jaǵdaıyn jasaıtyn 17 qyzmetker bar. Saýyqtyrý mekemesine Almatyda turaqty tirkeýi bar zeınetkerler kele alady. Ol úshin Halyqqa qyzmet kórsetý ortalyǵyna tıisti qujat tapsyrýy shart.

«Óziniń turǵylyqty meken-jaıy boıynsha Qyzmet kórsetý ortalyqtaryna baryp, zeınetkerlik kýáligi, medısınalyq kýáligi sıaqty qujattaryn tapsyrýy kerek. Sol qujattardy tapsyrǵannan keıin, olardy Qyzmet kórsetý ortalyǵy Áleýmettik basqarmaǵa jiberedi. Al olar óz kezeginde, qolyna joldama berilgen zeınetkerlerdi bizge jiberedi», – dedi Almaty qalasy Zeınet jasyndaǵy tulǵalardy kúndiz qabyldaý ortalyǵynyń jetekshisi aınur Eshmanova.

Ońaltý ortalyǵyna zeınetkerler 2 aıdan artyq kele almaıdy. Óıtkeni, ótinish bergen ózge qarttar uzaq kezek kútip qalmaýy tıis. Almaty qalasynda bastaý alǵan tyń jobanyń jumysymen búgin Májilis depýtattary da tanysty. Halyq qalaýlylary saýyqtyrý mekemesiniń tıimdi ekenin aıtyp, bolashaqta olardyń sanyn ózge óńirde de kóbeıtý qajettigin alǵa tartty.

«Bıyl osy baǵdarlamany iske asyrý úshin 160 mıllıon teńgege jýyq qarjy bólindi. Ol 222 myń adam úshin asa kóp aqsha emes dep oılaımyz. Sonyń ishinde, 26 mln teńge osy ortalyqty iske asyrý úshin bólingen. Iaǵnı, adam basyna kúnine 3200 teńge bólinedi. Onyń ishine osy jalǵa alý ǵımaratty, qyzmetkerlerdiń eńbekaqy, zeınetkerlerdi úılerinen alyp ketip, qaıtyp aparý, ıaǵnı tasý jumysy kiredi», – dedi Almaty qalasy Jumyspen qamtý jáne áleýmettik baǵdarlamalar basqarmasynyń basshysy Meıirjan Otynshıev.

Búginde Almatyda zeınet jasynda 222 myń adam bolsa, olardyń ómir súrý uzaqtyǵy tek 12 paıyzdy qurap otyr eken. Sondyqtan qarttardyń uzaq jasaýyna jaǵdaı jasaý barynsha qolǵa alynbaq. Osyndaı ońaltý ortalyqtaryn qalanyń ózge aýdandarynda ashý josparda bar.