Dáýir kóshti...
Túnde sýyt habar aldyq. Sóılep ketse - sheshen, kósh bastasa - kósem, parasattylyqtyqtyń, degdarlyqtyqtyń etalonyndaı bolǵan aqylman aqsaqal, qoǵam jáne memleket qaıratkeri Seıilbek Shaýhamanov kókemizdiń jaryq dúnıedegi násipti kúni taýsylypty. Tutas bir dáýir kóship ketkendeı áserde otyrmyz.
Qaı dúnıeni bolmasyn aqyl parasattylyǵy turǵysynan qarap, árbir iste ulttyń upaıyn túgendep, urpaq bolashaǵy úshin alańdap, qazaqy qalypymyzdyń saqtalýyna asa mán berip, memleket damýynyń mazmunyn udaıy nazarynda ustap otyratyn danagóı danyshpanymyz edi.
Biz Seıilbek Shaýhamanovty es bilgennen biledi ekenbiz. Ol kisi Shıeli aýdanynyń birinshi hatshysy bolǵan. Bizdiń kókem Eńbekshide ferma meńgerýshisi. Taýdyń oıly-qyrly jolymen shopandardy aralap, Syrdyń qum basqan soqpaǵynda malshylardyń jaǵdaıyn jasap, kúzdeýge kóshse sonda baryp, kókteýde otyrsa, basynda júrip, qoı tóldese birge bolyp, qyrqymda tirlikti qadaǵalap, shóp-sýyn túgendep tynym tappaıtyn kókem bizdiń tilimiz shyǵyp, aıaǵymyz júre bastaǵannan qasyna ertip alady eken. Uzaq jolda ish pysady, onyń ústine balanyń byldyry jan sergitedi ǵoı. Sonda kókem "Erjan myna joldy kim jóndeýi kerek?" dep suraıdy eken. Biz "Shaýhamanov" dep taq ete qalamyz. O kezde Shaýhamanovtyń naqty kim ekenin bilmeımiz ǵoı. Biraq atyn aıtyp óstik. Kókem túrli mysalǵa jaýapty kim degende biz Seıilbek aqsaqaldyń atyn ataıtyn edik. Keıin osy jaǵdaıdy ózine aıttyq. Ózine tán kúlkisine salyp "Baıekeń birbetkeı, isker, eldiń jaıyn biletin, jurtyna es bolǵan azamat edi ǵoı" dedi. İshimiz jylyp sala berdi.
Jazǵan-syzǵanymyzdy únemi oqyp, kezdesken jerde pikirin aıtyp, oıyn bildirip otyratyn. Arasynda "Shaýhamanov qoı" dep telefon soǵyp, ózi jazǵan dúnıelerdi gazetke usynatyn. Oqysańyz, tunyp turǵan tárbıe men tálim edi. "Artyq-kemi bolsa, óziń qararsyń" deıtin sypaıy ǵana. Qaıdaǵy? Baltalasań buzylmaıtyn qurmalas sóılemderdiń ár sózi óz ornynda qolmen qalaǵandaı turýshy edi. Bir árpine qalam tıgize almaısyń. Anaý-mynaý jazýshy o kisiniń deńgeıinde jaza almaıtyn.
Seıilbek aqsaqal oblysty eń bir qıyn zamanda basqardy. Biraq eldi daýǵa qaldyrmaı, naryqtyń daýyly men jaýynyna barynsha uryndyrmaı alyp shyqty. Ýaı, dúnıe-aı, sóıtken Seıilbek kókemiz de kóshipti ómirden.
Qyzmet aýystyrǵan kezimizde Bekejanov teatrynda kezdesip qaldyq. "Erjan-aý, aspandy jerden bir-aq shyǵardyń ǵoı" dedi. "Nege kóke?" deımiz kúlip. "Ana zamanda da, myna zamanda da gazettiń sobkorrlyǵynan partıanyń hatshylyǵyna barǵan adam joq" dep jymıdy. Sosyn jas kezimizde barlyq jumysty kórip, biraq qalamǵa berik bolýdy tapsyryp edi. Keıinnen Shymkentte Salqam Jáńgir han men Jalańtós Bahadúrge eskertkish ashylyp, qyzylordalyq aqsaqaldardan quralǵan delegasıany bastap bardyq. Joly boıy kókelerimizdiń bar jaǵdaıyn jasap, qolqanat bolýǵa tyrystyq. Aýylǵa qaıtyp kelgende rıasyz alǵysyn aıtyp, batasyn berip, "jýrnalısıkadan memlekettiń isine daıyn kelgen ekensiń" degen iltıpatty sózin búkpesiz aıtyp edi. Ylǵı tileýlestigin jasyrmaı, meıirimi men jylylyǵyn tógip otyratyn. Sóıtken Seıilbek Shaýhamanov ta toqsannyń tabaldyryǵynda turyp kelmestiń kemesine minip kete barypty. Qosh bolyńyz, kóke! Aldyńyz jaryq, ımanyńyz kámil, topyraǵyńyz torqa, ornyńyz jumaqtan bolsyn!
