Almatylyq ismerler tigip jatqan álemdegi eń úlken quraq kórpeniń 80 paıyzy daıyn. Ony daıyndaýǵa turǵyndar, qaladaǵy joǵary oqý oryndary men kolejderdiń stýdentteri úles qosýda.

Búgin Qazaqstan quraq quraý sheberleri qaýymdastyǵy japondyq tigin mashınasyn syıǵa tartty. Osylaısha qalalyq Ortalyqtandyrylǵan kitaphanalar júıesi usynǵan bastamaǵa qoldaý kórsetti. Sheberler quraq kórpeniń alǵashqy bólshekterin tigýdi Naýryz merekesinen bastaǵan edi.  

«Qaýymdastyq prezıdenti Tamara Bekmuratqyzy hanymǵa úlken alǵysymyzdy aıtamyz. Áli de aksıa jalǵasýda. Qala turǵyndary men osy ıgi iske úles qosqysy keletin azamattardy shaqyramyz. Belgilengen deńgeıine jetip, óz sharshy metrin aıaqtap tikkennen keıin, onyń qorytyndy bólimi bolady. Aksıaǵa belsene atsalysqan ár turǵynnyń, ár memlekettik mekemeniń aty atalǵan arnaıy tizim shyǵady. Sondaı-aq, marapattaý saltanaty da bolady», – dedi Almaty qalasy Ortalyqtandyrylǵan kitaphanalar júıesi dırektorynyń orynbasary Lázzat Spataeva.

Alyp quraq kórpeni tigýge qaladaǵy 25 kitaphanada tigin bólmeleri daıyndalǵan. Onyń jalpy kólemi, 25 myń 500 sharshy metrdi quramaq. Aksıa Qala kúninde, ıaǵnı 16 qyrkúıekte óz máresine jetedi. Buǵan deıin álemde mundaı kórpe Portýgalıanyń Porto qalasynda tigilgen. Onyń kólemi 25 myń 100 metrge jetipti.