Ótken ǵasyrdyń aıaǵynda qoldanysqa berilgen mektepterde seısmıkalyq turaqtylyq aýystyrylyp, shatyrlarynan bastap, edenderine deıin jańartylyp jatyr.  

M. Áýezov aýdanyndaǵy myna mektep ótken ǵasyrdyń 90-shy jyly qoldanýǵa berilgen. Sodan beri munda kúrdeli jóndeý jumystary júrgizilmegen. Tek jyl saıyn eskirgen tustary jóndelip otyrǵan. Al bıyl bilim ordasy tolyqtaı basqa keıipke enedi. Shatyrynan bastap, edenine deıin jańartylyp jatyr. Sonymen qatar, jer silkinisi kezinde 9 balǵa deıin shydas beretin qurylǵylary da aýystyrylǵan.  

«Mektep tolyǵymen qorshaýynan bastalyp, sport alańyna deıin barlyǵy tolyǵymen kúrdeli jóndeý jumystarynan ótkiziledi. Ár kabınet zaman talabyna saı jabdyqtalady. Oqýshylar tolyǵymen jańa talaptaǵy mektepke kiredi», – dedi Almaty qalasy A.Baıtursynuly atyndaǵy №139 mektep-gımnazıa dırektory Erik Qýatbekov.

Qurylys jumystary qujat boıynsha jeltoqsan aıyna deıin bitý kerek. Merdiger kompanıa jumysty qarashada tolyǵymen aıaqtaımyz dep otyr. Al osy mekteptiń oqýshylary ol ýaqytqa deıin jaqyn mańdaǵy mektepterge baryp bilim ala turady. Sonymen qatar, kúrdeli jóndeýden ótip jatqan taǵy 3 mekteptiń tálimgerleri de dál solaı isteýge májbúr.  

«Qazirgi kezde Bilim basqarmasy tarapynan bul úsh mektepte de balalardy jaqyn mańdaǵy mektepterge ornalastyrý jóninde buıryǵy shyqqan. Balalar birinshi toqsanda, bálkim, ekinshi toqsannyń alǵashqy bir aıynda bilimderin sol mekteptiń qasynda ornalasqan mektepterde jalǵastyratyn bolady», – dedi Almaty qalasy Bilim basqarmasy basshysynyń orynbasary Lázzat Jylqybaeva.

Al №123-shi mekteptiń qurylysyna jaýapty kompanıa jumystaryn ýaqytynan buryn bitirgendikten, oqýshylar 1-shi qyrkúıekte jańartylǵan ǵımaratta oqý jylyn bastaıdy. Qazir munda partalar kirgizilip, tazalyq jumystary júrgizilip jatyr. Bul mektepte de seısmoturaqtylyq jańartylǵan. Qoldanylǵan materıaldardyń barlyǵy otandyq ónimder. Munda jóndeý jumystary sáýir aıynda bastalǵan eken.

«Negizinen, kúrdeli jóndeý jáne seısmıkalyq nyǵaıtý jumystary júrgizildi. Jóndeý jumystary 2018-shi jyldyń jeltoqsan aıyna deıin sozylatyn shyǵar dep eseptegen edik. Degenmen, merdiger kompanıa ózderiniń mindetin merziminen buryn aıaqtap, mektepti tapsyryp otyr», – dedi Almaty qalasy Qoja Ahmet Iasaýı atyndaǵy №123 mektep-gımnazıa dırektory Baǵıla Áshimbaeva.  

Búgingi tańda Almaty qalasynda 250-den astam bilim oshaǵy bar. Olardyń 203-i – memlekettik mektep. Jyl saıyn megapolıstegi mektepterdiń seısmoturaqtylyǵy jańaryp otyrady. 2025-shi jylǵa deıin qaladaǵy barlyq bilim ordalarynda kúrdeli jóndeý jumystaryn júrgizip bitemiz deıdi Bilim basqarmasynyń mamandary.