I Halyqaralyq Almaty Film Festival aıasynda Kann kınofestıvaliniń júldesine ıe bolǵan «Aıka» fılmi kórsetiledi.
Qazaqstan halqy kúzde «Aıka» fılminiń sońǵy nusqasyn birinshi bolyp kóre alady.
«Týyndynyń rejıseri Sergeı Dvorsevoı Kann kınofestıvalinde fılmniń jumys nusqasyn kórsetti. Bul - festıváldyq fılm, sondyqtan kórermen mundaı erekshe dúnıeni kórýge daıyn bolýy kerek. Bul, ádettegideı, popkorn ustap, kóńil kóteretin fılm emes. Kıno Máskeýde turatyn qyrǵyz mıgranttarynyń ómiri týraly. Fılm qoǵamdaǵy mıgranttarǵa degen kózqarasty ózgertý úshin, olardyń ómiri týraly oılaný úshin jasalǵan» - deıdi «Aıka» fılminiń prodúseri Gúlnar Sársenova.
Atalǵan fılm Qazaqstanda ótetin Almaty Film Festival HKF ashady. 15 qyrkúıekte qazaqstandyqtar arnaıy shaqyrý boıynsha fılmdi kóre alady.
Festıvál Almaty Kúni merekesiniń aıasynda ótedi. Almaty Film Festival-di Astana Film Fund Almaty qalasynyń ákimdigimen birlese uıymdastyryp otyr.
Ol «Mádenıetter jaqyndastyǵy» devızimen ótedi. Kınoforým Almatyda kınematografısterdiń halyqaralyq yntymaqtastyǵyn damytýǵa jáne qalaǵa halyqaralyq jobalardy tartýǵa baǵyttalǵan. Bul shara qala ımıjin elimizdiń mádenı jáne týrısik ortalyǵy retinde halyqaralyq deńgeıde kóterýge tamasha múmkindik beredi.
Fılm alty jyl túsirilgen. Búdjeti - 2,5 mıllıona evro. Bul áleýmettik drama - Reseı, Qazaqstan, Germanıa, Polsha jáne Qytaı elderiniń birlesken ónimi. Qazaqstandyq aktrısa Samal Eslámova osy fılmdegi róli úshin 2018 jyldyń 19 mamyrynda Kann kınofestıvaliniń «Eń úzdik áıel róli» júldesin jeńip alǵan bolatyn.
