Almaty ákimi Baýyrjan Baıbek qalanyń jaıaý júrginshi jáne kólik ınfraqurylymyn rekonstrýksıalaý qarqynyn jedeldetýdi tapsyrdy. Jumys sapary kezinde megapolıs basshysy Abaı alańyn qaıta jańǵyrtý men Tımırázev kóshesindegi BRT jelisin salyp jatqan merdigerlik uıymdardyń jumys qarqynynyń tómendigi men sapasyzdyǵyn atap kórsetti.
Jumys sapary barysynda ol qalanyń Qurylys basqarmasyna on kún ishinde Respýblıka Saraıynyń aldyndaǵy Abaı alańyna kespe tastar tóseýde ketken olqylyqtardy qalypna keltirýdi tapsyrdy. Budan ózge, qalanyń barlyq qurylys alańdarynda júrgizilip jatqan jumystarǵa tıisti baqylaýdy kúsheıtý qajettigin eskertti.
«Qazirgi kezde qalanyń tek tarıhı ortalyǵyn rekonstrýksıalaý úshin úsh myńǵa jýyq jumys orny quryldy, barynsha aýqymdy jumystar atqaryldy. Árıne, ýaqyt barynsha tyǵyz, degenmen Respýblıka Saraıy aldyna tóselgendeı sapasyz jumystyń qajeti joq. Barlyǵyn qaıta tóseńder», - dedi Baýyrjan Baıbek.
Aıta keterligi, buryndary sapasyz jumystary úshin birneshe merdigerlerge aıyppul salynǵan edi. Qala ákimdiginiń komısıasy kóshelerdi abattandyrý boıynsha qurylys jumystarynyń barysyn tekserip, merdigerlik uıymdar atyna qatań eskertpeler jasaǵan bolatyn.
