Qalanyń Energetıka jáne komýnaldy sharýashylyq basqarmasynyń aqparaty boıynsha qazirgi kezde Almatyda 79993 jaryq kózderi ornatylǵan. «Qaýipsiz qala» baǵyty boıynsha jyl aıaǵyna deıin 24000-nan astam jaryq kózderi nemese 31,5%-y energıa jınaqtaýshy jáne dıodty shamdarǵa aýystyrylady.

Qazirgi kezde Áýezov aýdanynda 49,5 km kóshe jaryǵynyń qurylys bastaldy. Jyl aıaǵyna deıin Alataý aýdanynda syrtqy jaryqtyń 24 km jelisin tartý josparlanǵan.

Qazirdiń ózinde Baǵanashyl, Alataý, Ermensaı jáne Nurlytaý eldi mekenderinde 35,3 km syrtqy jaryq kózderi ornatylǵan. Túrksib aýdanyndaǵy Buqtyrma, Maılın kósheleri men Qulja traktinde 9 km syrtqy jaryq kózderi jumys isteýde.

Bulardan ózge, keler jyldan bastap taǵy 266 km jaryq kózderin nemese 8896 kóshe shamdaryn (11,5%) modernızasıalaýdyń jobalyq- smetalyq qujattary jasalǵan.

Memlekettik - jeke áriptestik jobasy aıasynda qalanyń Energetıka jáne komýnaldy sharýashylyq basqarmasy 2019 jyldan bastap taǵy 1375 km jaryq jelisin nemese 45829 kóshe shamdary men 42052 jaryq dińgekterin jańartýdy josparlaǵan.

Qala basqarmasyndaǵylar dıodty jaryq shamdarynyń elektroenergıasyn paıdalanýdy 30 paıyzǵa qysqartyp, qala búdjetiniń shyǵynyn azaıtatynyn, kóshe jaryǵynyń sapasyn jaqsartatynyn málimdedi. Onyń ústine olardyń paıdalaný merzimi de uzaq.