Jeti han jerlengen kóne shahar – Saraıshyq qalashyǵynda jaǵalaýdy bekitý jumystary aıaqtaldy. Jibek joly boıynda ornalasqan tarıhı oryn endi týrısik ortalyqqa aınalady.

Jobaǵa sáıkes, bul ortalyq týrıser men kelýshiler úshin barlyq jaǵdaı jasaǵan tolyq keshen bolady. Munda ákimshilik ǵımarat, qonaqúı, sharýashylyq-turmystyq úıi syndy birneshe ǵımarat boı kóteredi dep kútilýde. Qos qabatty ákimshilik ǵımarat ishinde ekspozısıalyq-kórme zaldary, qor qoımasy, 100-150 oryndyq konferens-zal, zerthanalyq jáne qalpyna keltirý úı-jaıy, kitap qoımasy men elektrondy málimetter bazasy bar kitaphana ornalasady. Budan bólek, keshen aýmaǵynda leksıa ótetin alańdar, ashyq aspan astyndaǵy mýzeı men etnoaýyl bolady.

«Vızıt-ortalyq týrızmniń damýyna septigin tıgizip, Saraıshyq sokraldy qalashyǵyna jurtshylyqtyń nazaryn aýdarady»,- deıdi aımaq basshysy Nurlan Noǵaev.

Elbasy Nursultan Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasy aıasynda munaıly mekende júzege asyrylyp jatqan birden-bir iri joba Saraıshyqtyń mádenı murasyn saqtaýdy kózdeıdi. Saraıshyq kezinde Altyn ordanyń qolóner jáne saýda ortalyqtarynyń alǵashqylarynyń biri bolǵan. Keıin Noǵaı ordasynyń astanasy atandy. Saraıshyq týraly alǵashqy jazba derek qaldyrǵan – arabtyń belgili geograf-ǵalymy, saıahatshysy Ibn-Batýta. Ol óziniń saıahattarynyń birinde 1334 jyly «Úlken Saraı» qalasynan shyǵyp (Saraı-Berke – Altyn ordanyń astanasy), Azıaǵa jasaǵan saparynda Saraıshyq qalasynda bolǵan. Bul jóninde ol: «Biz Saraıshyq qalasynan at jekken arbamen on kún jol júrip, Saraıjúk qalasyna jettik. Bul «Ulysý dep atalatyn» úlken, tereń, aǵysy qatty ózenniń jaǵasyndaǵy gúldengen ásem qala eken jáne dúnıe júzindegi Baǵdattan keıingi ekinshi júzbeli kópir osynda eken» deıdi. Bul jazba Saraıshyqtyń sol zamandaǵy dúnıejúzindegi eń mańyzdy qalalardyń biri bolǵandyǵyn ańǵartady.

Jeti han jerlengen Saraıshyq tarıhı qalashyǵy Atyraý qalasynan 50 shaqyrym qashyqtyqta, Mahambet aýdanynyń Saraıshyq selosynda ornalasqan.

Elbasynyń «Bolashaqqa baǵdar: rýhanı jańǵyrý» baǵdarlamalyq maqalasy aıasynda endi jańa oqý jylynan bastap mektep oqýshylary «Ólketaný» páni boıynsha bilim alady. 5-7 synyptar úshin oqytylatyn jıyrma saǵattyq «Ólketaný» páni   «Geografıa», «Qazaq tili», «Qazaq ádebıeti», «Qazaqstan tarıhy», «Mýzyka» pánderine kiriktirilip, qosymsha oqytylatyn bolady. Týǵan jerge degen súıispenshilikti, patrıotızmdi nyǵaıtýǵa baǵyttalǵan oqýlyq 125 betten turady.

 «Jańa pándi saraptaý jumystaryna H.Dosmuhamedov atyndaǵy Atyraý memlekettik ýnıversıtetiniń profesor-oqytýshylyq quramy, oblystyq arhıv, tarıhı-ólketaný, kórkemsýret  jáne qoldanbaly sándik óner mýzeıleriniń ǵylymı qyzmetkerleri qatysty. Sondaı-aq, ólketanýshylar, tarıhı-ólketaný eskertkishterdi qorǵaý mamandary, tájirıbeli pedagogtar da úles qosty. Oqýlyq mazmunynda saraptamalyq keńestiń usynystary eskerildi. Bıyl oqý baǵdarlamasyna alǵash engen pán aldaǵy jyldary basqa da synyptarǵa usynylýy múmkin», –  deıdi «Rýhanı jańǵyrý» Atyraý aımaqtyq jobalyq keńsesiniń dırektory Oryntaı Bımanova.

"Saraıshyq" etnovızıttik ortalyǵyn salý jáne osy jumystardy uıymdastyrý maqsatynda respýblıkalyq deńgeıde arnaıy mekeme quryldy. Vızıttik ortalyq aımaqtyq týrızmdi damytý áleýetin kúsheıtý baǵytynda jumys isteıtin bolady.

Óz zamanynda qazaq handyǵynyń astanasy bolǵan Saraıshyq – talaı ulylardyń tuıaǵy tıgen orda. Saraıshyqtyń osyndaı tarıhı mańyzyn arttyrý maqsatynda Atyraýda halyqaralyq deńgeıde «Uly dalanyń uly dástúrleri» atty  festıvál ótkizdik. Ondaǵy maqsatymyz – elimizdiń batys óńirinde saqtalǵan «kórisý» dástúrin túrki tildes halyqtar arasynda dáripteý edi. Qazir adamdar ózara qol alysyp qana kórisip júr. Al, tarıhqa kóz júgirtsek, ata-babalarymyz kezinde bir-birimen tós qaǵystyryp kórisken. Adamdardyń tós qaǵystyrýynyń bir-birine pozıtıvti energıa beretini medısınada dáleldengen. Jýannyń jińishkerip, jińishkeniń úziletin shaǵynda, ıaǵnı óliara kezeńde qazaqtardyń bir-birine jylý energıasyn berýi – úlken danyshpandyq. Osylaısha, Saraıshyq ulttyq qundylyqtarymyzdy dáripteýde  zor mańyzǵa ıe bolyp otyr", - deıdi Oryntaı Bımanova.