Elbasynyń «Bolashaqqa  baǵdar: rýhanı jańǵyrý» baǵdarlamalyq maqalasy aıasynda «Teńizshevroıl» birlesken kompanıasynyń shırek ǵasyrlyq mereıtoıyna arnalǵan fotokórme jasaqtaldy. 

Fotokórme oblystyq Sh.Sarıev atyndaǵy kórkemsýret jáne qoldanbaly-sándik óner mýzeıinde ashyldy. Oǵan Teńiz kenishin alǵash ashýshylar, sala ardagerleri, kásiporyn qyzmetkerleri, zıaly qaýym ókilderi qatysty. Maqsat – seriktestiktiń tynys-tirshiliginen syr shertý. Osyǵan deıingi jáne qazirgi atqarylyp jatqan jumystardy halyq arasynda nasıhattaý.

Aldymen «qara altyn» ıgiligin dúıim elge jetkizgen kásiporyn týraly derekti fılm kórsetildi. Onda «Teńizshevroıldyń» qyzyq pen qıyndyqqa toly sara joly ádemi kórinis tapqan. Al, fotokórmeniń shymyldyǵyn kásiporynnyń bas dırektory Ted Echıson quttyqtaý sózimen ashty.

– Biz 1993 jyldan beri bilikti mamandardyń arqasynda jemisti eńbek pen tolaıym tabystarǵa qol jetkizip kelemiz. Jetistiktiń negizgi syry osynda dep oılaımyn. Eger adam óz jumysyn shynaıy súıispenshilikpen jasamasa, odan eshteńe shyqpaıdy. Mine, aınalasyna kásibı sheberler shoǵyrlanǵan «Teńizshevroıl» búgin búkil álem kóz tikken alyp kompanıaǵa aınalyp otyr, – dedi ol.

Osydan keıin atalǵan mekemeniń úkimetpen jáne jurtshylyqpen baılanys jónindegi bas menedjeri Rzabek Artyǵalıev pen mýzeı basshysy Tólegen Orynbasaruly kórme jumysyna sáttilik tiledi. Qabyrǵaǵa ilingen ár sýret kompanıanyń túrli kezeńin qamtıdy. Sondaı-aq, «Keleshek keńeıý» jobasy da beınelengen. Barlyǵy – 36 sýret.

Jınalǵandarǵa óndirisi órkendep, kókjıegi keńeıip, munaı-gaz naryǵynda naǵyz kóshbasshyǵa aınalǵan kompanıanyń kesheden búginge deıin atqarǵan jumystary egjeı-tegjeıli baıandalǵan kitap jınaǵy úlestirildi. Onda ár jyldyń ózine tán ereksheligi  taldanyp, saralanyp jazylǵan.