Astana Media Week alańynda kontent-market 15 telearna men 50-den astam prodakshen-stýdıanyń basyn qosty.
Astana Media Week medıaaptalyǵynyń shymyldyǵyn búgin, ıaǵnı 26 qyrkúıek Qazmedıaortalyǵynda ótkizilip otyrǵan kontent-market is-sharasy ashty. Aıtýly kórmege 15 televızıalyq kompanıa, 50-den astam prodaksh-stýdıa jáne taǵy da basqa medıa ınstýrıanyń oıynshylary qatysýda. Kórme barysynda qatysýshylar óz jobalaryn ortaǵa salyp, otandyq medıa salanyń ózekti máselelerin talqylaýda.
Astana Media Week-2018 medıaaptalyǵynyń ashylý saltanatynda sóz alǵan Qazaqstan Respýblıkasynyń Aqparat jáne komýnıkasıalar mınıstri Dáýren Abaev qazirgi Qazaqstan qoǵamyndaǵy medıanyń mańyzdylyǵyna erekshe toqtalyp ótti.
«Sizderdiń ıdeıalaryńyz kún saıyn aqparattyq landshafty ózgertip qana qoımaı, sonymen qatar saıasattan bastap qarjyǵa deıingi, aýyl sharýashylyǵynan bastap sportqa deıingi túrli salalardaǵy úderisterge kúsh berýde. Osynyń nátıjesinde ózekti máselelerdi keńinen talqylaý, naqty sheshimderdi ázirleý jáne ári qaraı jumys isteý mehanızmderi aıtarlyqtaı artyp keledi. Dál osy maqsatty kózdegen Astana Media Week aptalyǵy óz alańynda jýrnalıser men memlekettik organdary ókilderiniń ǵana emes, sondaı-aq PR-qoǵamdastyǵy men sheteldik mamandardyń da basyn qosyp otyr », - dedi D.Abaev.
Sonymen birge, ótken jylǵy Astana Media Week-2017 medıaaptalyǵynda respýblıkalyq telearnalardyń kóptegen jańa ári qyzyqty jobalardy ashqandyǵyn atap ótti jáne kásibı qoǵamdastyq úshin AMW dástúrli sharaǵa aınalatyndyǵyna senim bildirdi.
Kontent-market – medıa-kontentke tapsyrys berýshiler, iri televızıa jáne radıokompanıalar men prodaksh-stýdıa, shyǵarmashylyq ujymdar, prodúserlik ortalyqtar, aqparat salasyndaǵy avtorlyq jobalar, medıa-oıyn-saýyq, mýzyka jáne kıno sıaqty óndiristiń jeke naryq ókilderi arasyndaǵy dıalog úshin tıimdi alań.
Budan bólek, búgin kásibı mamandar televızıalyq, ınternet jáne basqa da medıaónimderdiń jobalaryn usynǵan kásibı jáne ashyq pıchıngter ótýde. Sondaı-aq, medıaaptalyqtyń qatysýshylary «Bolashaq mamandyqtary» dep atalǵan beıresmı MediaTalks konferensıasynda medıa ındýstrıanyń asa mańyzdy taqyryptaryn talqylaıtyn bolady.
28 qyrkúıekke deıin jalǵasatyn Astana Media Week-2018 medıaaptalyǵyna 2000 qonaqtar men qazaqstandyq jáne sheteldik medıa ındýstrıanyń 60 top menedjeri, 15 respýblıkalyq telearna men 50-den astam prodakshn-kompanıalar qatysýda. Atalǵan is-shara sheńberinde zamanaýı medıa-naryqtardy damytýdyń mańyzdy taqyryptary boıynsha sheberlik synyptary men paneldik pikirtalastar, aımaqtyq BAQ forýmy jáne sheteldik sarapshylardyń qatysýymen Astana Digital Forum ótedi.
