4 qazan kúni Aqtóbe qalasynda toǵyz qabatty úıdiń birneshe qabaty órtke orandy.TJD bergen málimetter boıynsha, Ábilqaıyr han dańǵyly boıyndaǵy úıde oryn alǵan órt týraly habar saǵat 15.03-te túsken. Saǵat 15.11-de órt sóndirý qyzmeti oqıǵa ornyna jetedi. Saǵat 15.50-de órt aýyzdyqtalyp, 16.05-de sóndirildi. 200 adam evakýasıalanyp, úsh adam qutqaryldy. 40-qa jýyq páter zardap shekti, keıbir páterler túgel órtendi. Bul týraly Qamshy.kz aqparat agenttigi Aqtóbe oblysy ákiminiń baspasóz qyzmetine silteme jasap habarlaıdy.

Órtti sóndirýge jeke quramnyń 37 qyzmetkeri men jeti birlik tehnıka jumyldyryldy. Órt bolǵan jerde sholý jumystary júrgizilip jatyr.

Aldyn ala málimetter boıynsha zardap shekkender joq.

Qala ákimdigi men TJD birlese arnaıy komısıa qurdy. Olar órttiń shyǵý sebebi men keltirilgen shyǵyndy anyqtaıtyn bolady. Jergilikti atqarýshy organdar tarapynan órttiń saldarynan zardap shekken otbasylarǵa qajetti kómek kórsetilmek.