Qazaqstan prezıdenti Nursultan Nazarbaev "Qazaqstan ulttyq qaýipsizdikti qamtamasyz etý men dinı erkindikti qorǵaýdy teńdeı atqaryp otyrǵanyn" málimdedi dep jazady Qamshy.kz aqparat agenttigi Azattyqtyń deregin negizge alyp. Bul týraly prezıdent Astanada ashylǵan álemdik jáne dástúrli dinder jetekshileriniń 6- quryltaıynyń ashylý saltanatynda aıtty.

"Azamattarymyzdyń kópshiligi ózin musylman sanaǵanymen, ol basqa dinderdiń erkindigine kedergi keltirmeıdi. Sizder buny túrli dinderdiń hramdary salynǵan jáne adamdar qulshylyq jasaýǵa erkin bara alatyn astanamyzdy aralap kórýlerińizge bolady" dedi Nazarbaev.

Qazaqstan prezıdenti elde 18 dinı konfesıa men 3,5 myńnan astam dinı sýbekt tirkelgenin aıtyp, "konfesıaaralyq beıbitshilik pen kelisimniń qazaqstandyq modeli qalyptasqanyn" jetkizdi.

AQSH Memlekettik departamenti 19 qyrkúıekte jarıalaǵan terorızm týraly jyl saıynǵy esebinde Qazaqstanda terorızmge qarsy is-qımyl týraly normatıvtik-quqyqtyq baza jetkilikti ekenin jáne el bıligi "ekstremızmmen" kúres maqsatynda dinı azshylyq toptar men musylmandardyń din ustaný quqyqtaryn shekteıtinin málimdegen.

Quryltaıǵa 46 elden 82 delegasıa, onyń ishinde álemdik jáne dástúrli dinı konfesıalar men dinder jetekshileri, saıasatkerler, halyqaralyq uıymdardyń ókilderi keldi. Quryltaıda eki plenarlyq sesıa jáne tórt seksıa boıynsha otyrys ótedi. Seksıa jıyndarynda qubylmaly geosaıasattaǵy din, adamzatty biriktirýdegi jańa múmkindikter, din jáne jahandaný, ekstremızm men terorızmniń aldyn alýda dinı jáne saıası qaıratkerlerdiń róli degen taqyryptarda talqylaý bolady.